Pagbugtaw sa Damgo

“Ngano na man sab, Day?” nangutana siya.

“Basaha lang kuno na,” ni Mayen nga mitunol sa sobre kaniya.

Gidawat niya ang sulat. Ang bata midali dayon paglakaw, lahi sa nangaging mga higayon nga maghulat kini sa iyang balos.

Gidali paggilis ni Melchor ang ngilit sa sobre nga gisudlan sa sulat ni Laura. Gibasa dayon niya ang sulat. Apan may kasubo nga mikalit pagtabon sa kopa sa iyang kadasig niadtong tungora. Nagpasiugda’g kasubo ang unod sa sulat ni Laura kaniya.

Gihukman na ni Laura ang pagputol sa talikala nga nagdugtong sa duha nila ka kasingkasing. Gipadayag sa dalaga sa sulat ang kahiubos niini kaniya. Nakita sa dalaga nga walay maayong padulngan ang ilang relasyon gumikan sa kakulang niya sa panahon ngadto niini. Nakahukom si Laura nga mobiya sa ilang dapit ug molangyaw ngadto sa kaulohan.

Gibalik pagpilo ni Melchor ang papel nga iyang gitamdan ug giuli ngadto sa sobre. Dihay bangkil sa labing bangis nga mananap sa lasang nga mihambat sa iyang dughan. Nabatyagan niya ang kasakit sa iyang kahiladman. Gimahal niya si Lauro sa bug-os niyang kasingkasing. Sakit kaayo alang kaniya ang hinanaling hukom niini sa pagputol sa takgos sa ilang pagminahalay. -- Sumpayan pa