Nawong og Kwarta

Wala motingog si Dianne dihang mi-kiss na kaniya si Art. Sa hilom nakagusto usab si Dianne kang Art mao man gani nga misugot siya nga makigdeyt siya sa ulitawo.

Gipaundayonan lang ni Dianne ang mga pamarayeg ni Art kaniya. Nalinggatan ni Dianne nga wala mahimutang si Art samtang nagtagbaw sa pagparayeg kaniya. 

“Sukad nga nagkabuwag kami og ang akong girlfriend tulo ka tuig na ang milabay Dianne, karon pa ako mibati pag-usab og gugma diha kanimo,” matud ni Art.

Hanas na modala og palami si Art ngadto sa usa ka babaye. Apan wala kini magsilbi kang Dianne. Bisan sa taud-taud na nila nga pagparayganay apan wala gayud kini maanud sa kusug nga sulog sa ilang mga pagbati.

Apan kontinto na lang usab si Art bisan kutob ra sa kiss ang ilang nahimo atul sa una nila nga panag-uban. Didto sa diskohan, malipayon kaayo silang duha. Nananghid si Art nga moadto usa kadiyot sa CR.

Paggawas ni Art sa CR, nalantawan niya nga adunay kaestorya si Dianne. Usa ka tawo nga may pagka insikon. Duna kini gitunol ngadto ni Dianne. Naglamanohay ang duha sa wala pa molakaw ang lalaki. Pagbalik ni Art, wala gayud motug-an si Dianne nga may kaestorya siya nga lalaki samtang didto si Art sa CR. Nagpanglingi si Diane nga mora’g adunay gipangita apan ingon sa pinugngan usab ang iyang linihokan.

“Tana Art, mamauli na ta kay naglain ang pamati nako sa akong lawas,” giingnan ni Dianne si Art. Walay nahimo si Art gawas sa pagtuman sa awhag ni Dianne nga magpahatud na sa iyang gipuy-an. Milabay ang daghang mga adlaw ug kanunay na nga mag-adtoan si Art sa gipuy-an ni Dianne. “kapoy g’yud kaayo ko ron Art, walay gana nga ilihok,” matud ni Dianne nga nagpanghikap sa iyang tampihak.

“Basin og kahilantanon ka Dianne, hai’y maayo og masahean tika?” mitanyag si Art og serbisyo sa iyang girlfriend. “Kamao ka? Sigi mas maayo hinoon kay basin mawala ang akong kakapoy,” ni Dianne pa.

Gipaubo ni Art si Dianne sa taas nga lingkoranan gawas sa iyang kwarto apan daw naglisud g’yud siya sa posisyon. “Balhin na lang ta sa akong higdaan Art, adto lang ko masahii apan salig ra ko nimo ha?” matud ni Dianne.

Sa hilom nahinangop kaayo si Art. Giaplay dayon ni Art ang iyang naantigohan sa pagmasahe. Tuod. Mora’g nadutlan si Dianne sa kalalim sa iyang gibati. Nagpanglad-ok usab si Art sa iyang laway samtang nagmasahe sa dalaga. (Sumpayan)