Nawong og Kwarta

Daw gimagnet ang mga mata ni Art ug wala na gayud mobuwag sa paglantaw sa igwad kaayo nga sampot ni Dianne. Maoy diha sa kaisipan ni Art nga kun moabut gani ang adlaw nga ikauban niya si Dianne sa usa ka higdaanan, tagbawon gayud niya ang iyang kaugalingon sa iyang kaanyag.

Taud-taud, mibalik si Dianne gikan nga mi-time out sa iyang punch card. “Tana Art, asa man ta karon,” gisukna ni Dianne ang ulitawo samtang gidawat niya ang iyang bag nga gitunol kaniya ni Art.

“Sabado man karon Dianne, magdisko ta ug manuroy. Nindot karon ang kagabhion kay hayag man ang buwan,” giingnan ni Art ang promo girl.Nangaon sila sa usa ka kan-anan duol sa Fuente Osmeña. Human sa ilang pagpangaon, gigunitan ni Dianne ang kamot ni Art ug mitutok kini sa ulitawo.

Nakabantay si Art nga paraygon na karon kaniya si Dianne. “Kumusta na diay ang akong gihalad nga gugma Dianne? May paglaum na ba ko?” wala mag-usik og higayon si Art. Gipahiyoman siya ni Dianne ug miingon, “Kinahanglan pa ba gud nga akong litokon ang mga pulong Art?” ni Dianne pa.

Naglumpayat sa kalipay ang kasing-kasing ni Art nga nakadungog sa gisulti sa dalaga. “Salamat kaayo Dianne, salamat g’yud kaayo nga wala ko nimo gibasted. Atong saulogon karong gabhiona ang atong relasyon,” matud ni Art.

Giteksan ni Art ang iyang higala nga si Romy. Nalipay si Art kay wala mobalibad si Romy nga mohuwam siya sa iyang usa ka kotse nga wala gamita. “Ipahatud nako diha bai,” matud ni Romy sa iyang reply. Paglabay sa mga kinse minutos, may mi text kang Art.

“Sir, drayber ning Romy, dia na ang sakyanan sa parking area sa Fuente restaurant. Huwat ko nimo sa guard.” Giagni ni Art si Dianne nga manggawas na sila aron makabalhin sila’g laing dapit.

Pag-abut nila sa guard’s post. “Ikaw ba ang gisugo ni Romy paghatud sa sakyanan?” gisukna ni Art ang tawo nga abtik usab kaayo nga mitangdo. Gidawat ni Art ang yawe sa sakyanan. “Ikaw si Art sir?” Miyango-yango si Art.

“Hala, ma-enjoy g’yud diay ta ron Art kay nakamaneho ka man og kotse,” matud ni Dianne sa dayon nilang sakay sa kotse. Gipaandar ni Art ang kotse.”Magdisko ta Dianne. Apan pwede ba og mo-kiss ko nimo?” ingon sa nagpanagana si Art paghangyo nga mohawok siya sa dalaga. (Sumpayan)