Pagbugtaw sa Damgo

Mipadayon pa gayud siya paglakaw. Layo na siya’g naabtan sa iyang pagbaktas. Daw may gipangita ang iyang hunahuna. Apan hangtod niining higayona wala pa siya makakaplag og butang nga sarang iyang magamit sa iyang katuyoan. Gituman niya ang gitugon sa iyang tiyo Tibur kaniya. Gihatagan niya’g pagtagad ang tanang butang nga iyang nakita sa iyang paglakaw paingon sa iyang gipuy-an. Apan iyang nasuta nga lisod ang paghatag og bili sa usa ka butang kun ang maong butang tinuod gayod nga wala’y bili.

Wala madugay sa iyang pagbaktas, natukmaan niya ang usa ka busay. Daghang mga tawo nga nangaligo ug nanglaba. Nailhan niya ang duha ka babaye nga nagtabi samtang nagkapuliki ang mga kamot sa paglampurnas sa mga buling sa sapot nga ilang gilabhan. Ang usa mao si Remy, asawa ni Boy ang lain mao si Lalin, asawa ni Loklok.

Misaylo lang siya sa mga tawo nga diha sa busay niadtong tungora. Mipaturatoy siya paglakaw paingon ngadto sa unahan. Apan ang iyang hunahuna gihawiran niadtong duha ka babaye nga nanglaba. Mabdos na si Remy. Misugod na’g busyad ang tiyan niini bisan wala pay usa ka tuig sukad nagpakasal sila si Boy. Samtang si Lalin wala pa gayo’y anak kang Loklok sulod sa kapin sa tulo ka tuig na nilang panagluon sa salag sa kaminyoon.

Aduna gayo’y tawo nga produktibo ug aduna usay dili. Mao usab sa panginabuhi ug sa ubang pakigbisog, adunay tawo nga daling moasenso ug mulampos. Milugdang kining maong kamatuoran sa iyang alimpatakan. -- Sumpayan pa