Wala na magparamdam

Dear Tita Salie,

Have a nice day. Just call me Ms. Anne, usa ka dalaga. My problem is all about my love life. Duna ko’y boyfriend ug hapit na kami mag 2 ka tuig. Nagkalagyo mi, Tita, tungod kay milarga man siya paingon sa Bohol kay tua man siya didto nagtrabaho. Tawgon lang nato siya og Mr. J.

Lisod gyod ang relasyon kun layo kami sa usa’g-usa. Samot pa nga panagsa ra gyod ang among communication tungod kay wala man siya’y celfon. Usahay manghuwam siya og celfon aron motawag nako ug mao ra kanang higayona nga magkaestorya mi.

Tungod sa kalayo namo sa usa’g-usa nakasala gyod ko sa akong uyab, Tita. Duna koy nakaila nga si Mr. R. nanguyab siya kanako ug ako usab siyang gisugot kay maayo man siya diri nako ug na-develop ko niya. Kanunay lang ming magkuyog ni Mr. R. ug sa kadugayan duna gyod nahitabo namong duha. Apan wala usab magdugay ang among relasyon ni Mr. R., nagbulag ra pud mi.

Dihang nagbulag mi ni Mr. R, nibalik si Mr. J sa akong kinabuhi kay niabot man siya gikan sa Bohol. Apan wala ko’y gitago niya. Ako siya gisultian sa akong mga nasinati samtang layo siya nako. Apan iya lang gihapon ko nga gidawat kay kuno love man kaayo ko niya. Apan kalit ra usab siyang nawala ug wala na gyod magparamdam pa hangtod karon.

Unsa may akong buhaton, Tita? Ako pa kahang ipadayon ang akong gugma kang Mr.J? Palihug pasabta ko. Daghang salamat.

-- Ms. Anne

* * *

Dear Ms. Anne,

Mas maayo nga imo siyang gisultian sa tanan ug wala nimo gitago kaniya ang imong kasinatian aron imong nahibaw-an kun unsa gyud kamatinud-anon ang imong hinigugma diha kanimo. Kay ang tinuod nga nahigugma dili motan-aw kun unsa ug kinsa ka. Dili moila og dato o pobre, gwapa o dili gwapo, virgin ba o dili na. Ang tinuod nga nahigugma andam modawat bisan unsa pay dangatan sa iyang hinigugma ug andam manalipod tungod ug alang sa iyang hinigugma.

Pasagdi lamang usa siya. Tingali kun duna lay importanting giatiman ang imong hinigugma nga nagkinahanglan ang iyang tanang attention. Hatagi usa siya og higayon kay tingali kun mobalik ra unya siya ug magpakita na siya kanimo.

Apan kun molabay na ang pipila ka bulan, ayaw na lang siya og hunahunaa o padayon sa imong lakbay niining kinabuhia, kay imo ra unyang masugatan ang lalaki nga gitagana alang kanimo.

-- Tita Salie