Hapit maghikog

Dear Tita Salie,

A pleasant day ug kumosta? Tawaga lang ko sa pangalan nga Ethel/Maggie, homosexual ko, Tita, ug babaye gyod kaayong tan-awon kay ang akong mga senina pambabaye na gyod.

Sa akong kasinatian sa gugma, makaingon ko nga mas maayo pa ang mga American tungod kay moseryoso man sila sa ilang relasyon kanamong mga bayot. Ang mga Pinoy nga lalaki igo lang kaming gamiton aron makwartahan. Apan ang American ila ming ilhon nga tawo ug gihigugma sa tinuoray.

Nakauyab ko og half-Pinoy ug half American, Tita, 48 years old na siya ug may anak. Usa siya ka retired military. Nagkahigugmaay gyod ming duha. Ang iyang anak patawgon kanako og mama. Nagpuyo mi didto sa among lugar sa Dumaguete 8 months mi nga nagpuyo, Tita, apan nagbulag mi adtong niaging buwan.

Hapit ko maghikog kay love man kaayo nako siya. Wala na koy gana nga mokaon ug ang akong plano sa kinabuhi nawagtang ang tanan. Busa, nilarga ko dinhi sa Cebu aron malingaw ko. Dili na man ko maka-concentrate sa akong trabaho.

Halos kada gabii, Tita, magdamgo ko niya bisan kun wala nako magsige og hisgot kaniya. Unsa may akong buhaton aron ako maka-move on, Tita? Aron ako makagawas niining maong sitwasyon? Palihog pasabta ko. Daghang salamat.

-- Ethel/Maggie.

* * *

Dear Ethel/Maggie. Ato gyod nga kanuna’ng hinumduman nga before ta mosulod sa relasyon sa gugma dapat andam gyod kitang modawat og kasakit nga dala niini kay ang gugma dili lang kini pulos kalipay. Mao nga dapat andam ta kanunay masakitan kay panagsa ra gyod kana kun gugma na ang atong estoryahan nga walay kasakit. Bisan unsa pa kadako ang gugma sa usag-usa moagi gyod sila og kasakit.

Busa, natural ra gyod nga masakitan kita sa gugma. Ang importante mao nga makamao kang modala sa imong kaugalingon sa panahon nga nasakitan ka. Ayaw pagsige ug hunahuna sa kasakit nga imong gibati. Kun matumba paningkamot nga makabangon ka aron imong ipadayon ang imong paglakaw dala ang pag-amping aron dili kana matumba pag-usab. Kun imong mahinumdoman ang imong ex, hunahunaa ang mga happy moments ninyong duha ug pasalamati tungod kay imong nasinati nga nalipay ka tungod niadtong tawhana. Ug ayaw wagtanga ang imong paglaom nga imong masinati sa unahan ang lain pang kalipay.

Pahiyom lang everytime makahinumdom ka sa inyong past and be thankful. Lingawa ang imong kaugalingon, pangita diha ug mga buhatonon nga makalingaw kanimo aron hinayhinay nimo siyang makalimtan. 

-- Tita Salie