"Tungod sa Uwan"

Gidali paghuman ni Loloy ang iyang gitrabaho aron kuhaon na niya si Jane didto sa estasyon sa radyo nga diin siya nag-intern. Dili gusto si Loloy nga palabyon kining mao nga higayon nga si Jane na ang miagni kaniya nga siya kuhaon.

Tuod, gipaspasan sa pagkitiw ni Loloy ang iyang mga tudlo. Daw gigitik niya’g maayo ang iyang laptop. Giapas niya sa pagsuwat ang diha sa iyang huna-huna. Migawas dayon si Loloy sa opisina human niya ikatugyan sa editor ang iyang sinuwat.

Naghinam-hinam na gayud si Loloy. “Naa na ko padung diha,” giteksan ni Loloy si Jane. Dali kaayo nga naka-reply si Jane. “Wait ko nimo sa gawas.” Diha na tuod sa gawas sa estasyon sa radyo si Jane ug nakit-an dayon kini ni Loloy bisan layo pa siya sa iyang nahimutangan. “Asa ta karon Loy?” matud ni Jane dihang nakapahimutang na siya sa front seat. “Sabado man g’yud karon Jane, maglingaw-lingaw ta. Mag-dinner usa ta unya inigkahuman tilokon nato ang kagabhion ug kaadlawon sa paglingaw-lingaw,” matud ni Loloy. Wala magtingog si Jane. Sa kan-anan nga ilang gisudlan, gikahinagbo ni Jane ang iyang Ninong, ang nagkugos kaniya sa bunyag. Mi-amen siya. “Mao na ba kini ang imong boyfriend Jane?” nangutana ang Ninong ni Jane. Igo lang mipahiyom ang dalaga. Nangaon sila didto sa gamay’ng lamesa. “wala man ko nimo angkona nga imong boyfriend?” gikomedyahan ni Loloy si Jane. “Naunsa ka? Bisan wala pa gani tika sugta angkonon na tika nga boyfriend?”

Nagkataw-anay silang duha samtang nagtinutokay. Salabtonon kaayo ang kahulogan sa ilang mga tinan-awan. Nanggawas sila og misakay sa kotse. Sa wala pa mopadagan si Loloy sa sakyanan. “Salamat nga wala ko nimo pakyasa sa akong gugma Jane ha?”

“Hala, kinsay nag-ingon nga gisugot na tika Loy?,” milingi si Jane kang Loloy apan nagngisi. Wala na magdugay-dugay si Loloy, iyang giagbayan paghinay si Jane ug gipatikan sa unang kiss.

Wala na mopalag si Jane sa pag-kiss ni Loloy kaniya. Nag-ukobay ang masi’g nila ka mga ngabil. “Ako’y motiwas paggasto sa imong pagtoon Jane ug kun matapos na nimo ang imong kurso, magpakasal dayon ta.”

Subli sila nga nagparayganay. “Pastilan, ang atong relasyon nagsugod sa uwan. Kun wala pa ang uwan dili ako ang makahatud sa akong manghud. Kun dili pa tungod sa uwan, dili ka mapiskan og lapok ug wala unta kita magkaila.”

Gihagkan ni Loloy si Jane hangtud nga nagkainit pag-ayo ang ilang pagparayganay sulod sa kotse. “I love you Jane.” “Mahal ‘sab tika Loy.” (Kataposan)