Tungod sa Uwan

Gula 6

Wala magdugay si Loloy sa opisina sa hepe sa kapolisan. Paggawas niya, diha gihapon ang pundok sa mga reporters, apil na ang Mass Com intern nga si Jane.

“Suod diay mo Loy ni Kernel?” nangutana si Jane kang Loloy dihang gisugat sa intern ang iyang higala. Igo lang mitangdo si Loloy kay giabi-abi niya ang ubang mga reporters nga nahibulong kun unsay iyang tuyo kang Kernel Dela Cruz.

“Nasuko ka nako Jane? Wala ka man gud mo-reply sa akong mga text messages sukad gabii,” matud ni Loloy. Gipasabut ni Jane si Loloy nga wala siya maka-reply kay nahutdan siya’g load. “Naapikehan man gud sa budget Loy, pasensya na ha?”

Dali ra kaayo nga nakasabut si Loloy. Nalipay siya nga ang rason nga wala maka-reply kaniya si Jane mao diay nga wala siya’y cellphone load. Nagtoo baya gayud si Loloy nga nasuko na kaniya si Jane nga iya kining gipanguyaban.

“Ok lang ba nimo Jane kun hatagan ko ikaw og budget para duna kay load kanunay,” giingnan ni Loloy ang Mass Com intern. Dali kaayo nga nakapahiyom si Jane. “Sige Sir, wala na g’yuy putol ang atong text-text ana,” matud sa dalaga.

Mikuot si Loloy sa iyang pitaka. Gitunolan niya si Jane og tibuok usa ka libo ka pesos. “Dawata, dala na ang imong budget pang-snack ana Jane, take care ha,” matud ni Loloy nga pwerteng nakatutok sa panagway sa dalaga.

Nasabtan niya nga mora’g nagpanagana si Jane pagdawat tungod ba kaha sa kadaku sa iyang gihatag. “Ayaw kataha Jane. Dawata na kining kwarta kay para magamit nimo kun gutumon ka kay kuwang ka man kaha og budget,” ni Loloy pa.

“Text lang ko nimo unya Loy,” pahabol nga pulong ni Jane dihang misugod na pagsibog ang kotse ni Loloy paingon sa gawas sa kampo. Nagtoo si Loloy nga ikalipay na kaayo ni Jane ang paghatag niya og usa ka libo ka pesos.

Nakahukom si Loloy nga hatagan niya kanunay og budget si Jane. Pagka hapon, nakadawat si Loloy og text gikan sa Mass Com intern. “Sori dugay ko naka text, naglisud ko pagbuhat og news pero mauwaw na ko magpatabang nimo. Agia ko karon kun dili ka bisi.” 

Nalipay kaayo si Loloy nga daw si Jane ang nangita’g paagi nga sila magkauban pag-usab. (Sumpayan)