Pagbugtaw sa Damgo

Gula 14

Mibalik pagsaka sa taas ang iyang uyoan. Nahibilin siya sa tugkaran, nagduko nga daw nawad-an sa kabuot.

Unya kalit lang misanting ang iyang dalunggan. Didto sa taas sa payag mikarat ang makinilya nga mirapido og mga letra ngadto sa papel nga gitangag niini. Mipadayon na sa pagsulat ang iyang uyoan.

Dihay gitimbangtimbang nga mga sukna ang iyang hunahuna. Mobalik na ba lang kaha siya sa iyang agi? Dili na lang kaha niya ipadayon ang iyang katuyoan? Midughit sa iyang kahimungawong ang katahap nga wala’y interes ang iyang uyoan nga motudlo kaniya bahin sa panulat. Gidugangan hinuon niini ang iyang mga kalibog. Mopauli na lang kaha siya aron dili makasamok sa iyang uyoan nga nagpanday og obra maestra?

“Dali diri, Metlong,” gisangpit siya sa iyang uyoan nga mihunong pagdukdok sa makinilya.

Misaka siya’g balik sa payag. Miduol sa nahimutangan sa iyang uyoan. Sa ibabaw sa talad nga gipatungan sa makinilya, habig sa wala, dihay karaang halad sa Daily Post, usa ka pamantalaan nga miabot ang sirkulasyon sa iyang dapit. Sa unang panid niini dihay dakong hulagway sa pundok sa mga tawo nga naghimo’g welga. Nanagbitbit sila’g mga plakards nga gisulatan sa mga pulong: Peace Not War.

Ang iyang uyoan naingon sa usa ka igmat nga mananap sa lasang nga nakamatikod sa iyang tinan-awan. -- Sumpayan pa