Tungod sa Uwan - Gula 4

Tungod sa kasuod na nila ni Loloy ug Jane, dunay mga higayon nga tanyagan na sa dalaga si Loloy nga mobisita sa ilang balay.

Masinabtanon usab kaayo ang mga ginikanan ni Jane. Nalipay sila nga adunay makatudlo sa ilang anak kabahin sa aktwal nga pagpanibya sa radyo ingon man ang pagbuhat og balita.

Daghang higayon nga magdungan sila si Jane ug Loloy sa pagpanihapon. Dayon pagkahuman tudloan dayon ni Loloy ang dalaga kun unsaon ang tukma nga pagbasa sa balita aron nindot kini pamation sa kahanginan.

Usahay, biyaan na lang gani sila sa ginikanan ni Jane kun aduna kini adtoon sa gawas. "Nakamatikod ko nga mora'g walay mobisita kanimo dinhi Jane. Dili ba tigbisitahan nimo ang imong boyfriend?" nangutana si Loloy sa dalaga.

"Wala pa ko misulod anang gugma-gugma Loy uy kay makasamok na sa pagtoon," matud ni Jane. Apan sanglit sagad na makadungog si Loloy sa maong rason sa mga babaye, nahibawo na siya og unsay itubag.

"Ang pagbaton og boyfriend Jane dili kay maisip nga samok, kun dili inspirasyon gani kini sa imong pagtoon. Sama nako Jane, ikaw maoy akong bag-ong inspirasyon sa pagpanarbaho ning milabay’ng mga adlaw," daw misugod og pangulitawo si Loloy.

Wala tuyoa nga napalingi si Jane kang Loloy tungod sa iyang nadungog gikan sa ulitawo. "Ha? Ngano gud tawon nga ako may imong inspirasyon?"

Nagngisi si Loloy nga hinay-hinay'ng mitug-an sa iyang gibati, apan gipaagi lang niya sa komedya. "Imo man lang ko nga gibinuangan Loy uy. Dili baya ko gusto og bugal-bugal Loy," ni Jane pa.

Mikalit kaseryoso ang dagway ni Loloy. Makahigayon na silang duha og sultihanay kay nakahuman na si Jane pag-rekord sa iyang balita pinaagi sa telepono ngadto sa radio station diin siya nag-intern. 

"Salamat diay kaayo Loy ha nga gitudloan ko nimo unsaon paghimo ang balita, kun unsaon paghimo ang nindot nga lead paragraph sa news ug kun unsaon pagbasa niini sa kahanginan, apan labaw sa tanan mao nga gihatagan ko nimo’g jacket" matud ni Jane.

"Unya gabii na man Jane, mopauli na lang ko para makapahuway ka na. Sweet dreams Jane and don’t forget… I love you," hinay’ng gihikap ni Loloy ang suwang sa dalaga. Wala makatingog si Jane sa iyang nabati gikan mismo kang Loloy.

Wala siya masayod kun unsay angay'ng itubag. "Good night ha?" migawas si Loloy ug misakay dayon sa iyang kotse nga giparking atubangan sa balay sa dalaga. (Sumpayan)