Masahesta - Gula 4

Lumoy kaayo ang hawak ni Nelly nga gihikap ni Cesar. “Ayaw Sir, palihog respitahe ko kay masahe ra gyud ning ako Sir,” matud ni Nelly nga hinay’ng miwakli sa kamot ni Cesar nga mihapuhap na unta sa iyang hawak.

“Pasagdi lang ko Nell, ako ra’y mahibawo nga mohatag nimo og tip, dako ang ihatag nako nimo nga tip,” giingnan ni Cesar ang masahesta dungan sa paghapuhap na usab unta pagbalik sa hawak sa dalaga.

Apan misibog si Nelly aron dili maabot sa paghikap ni Cesar. “Please lang Sir, respitare ko. Tabangi ko nga molampos sa akong pangandoy sa kinabuhi. Ayaw gub-a ang akong kaugmaon Sir,” matud ni Nelly. Wala’y nahimo si Cesar gawas sa pagsanong sa hangyo sa batan-ong masahesta.

“Pwede ka nga mag-ilis og laing masahesta Sir kun gusto nimo. Basin dunay akong mga kauban nga mosanong sa imong ihangyo,” kalma nga pagpasabot ni Nelly sa iyang customer. Wala magtingog si Cesar ug igo lang mitutok sa masahesta.

Karon nasuta na gayud ni Cesar nga dili gayud madala niya si Nelly bisan unsaon paghaylo og dako nga tip. Sa hilom nakadayeg siya sa kalig-on sa iyang baroganan. “Nakadayeg kaayo ako nimo Nell kay buotan ka nga pagka babaye. Abi ba nako kadto og ang tanang masahesta mosugot og extra job,” matud ni Cesar.

Gipiyong ni Cesar ang iyang mga mata. Sa hilom iyang gibatyag ang kalalim nga iyang gibati nga gimasahean siya ni Nelly. “Ayaw kasuko nako Sir ha? Basin baya og dili ka na mobalik dinhi sa among massage parlor kay gibalibaran tika sa imong gusto,” daw may kabalaka ang tingog ni Nelly.

“No, mobalik gihapon ko dinhi Nell ug ikaw gayud maoy akong pamasaheon nako. Suki na ta gikan karon,” ni Cesar pa nga nagpahiyom nga nagsud-ong sa masahesta . Katapusan nga gimasahean ni Nelly ang nawong ni Cesar. Giayo kini’g hapyud-hapyud sa dalaga.

Tungod sa kalalim nga gibati ni Cesar, wala niya tuyoa nga nakatagpilaw siya samtang gimasahean ni Nelly. “Human na Sir,” matud ni Nelly nga maoy nakapahigmata ni Cesar. Gibiyaan ni Nelly si Cesar didto sa lawak. Gisul-ob pagbalik ni Cesar ang iyang karsones ug ang polo shirt.

Migawas si Cesar sa lawak nga gaan na ang paminaw. Midiritso siya sa counter ug gibayran ang iyang obligasyon. Dayon gipangita niya si Nelly sa grupo sa mga babaye nga nanglingkod sa sofa. “Uli ka na Sir?” gitimbaya siya ni Nelly.

“May ihatag ko nimo,” ni Cesar pa nga mitunol sa gipilo-pilo niya nga tibuok usa ka libo ka pesos. (Sumpayan)