Diin ako magkulang?

Kamo bang duha mora mo’g si Dingdong Dantes ug si Marian Rivera parison kaayo, matud ni Lynn sa manag-uyab nga sila si Lelio ug Nilda. Natural man lang na kay nagmahalay man mi, tubag ni Nilda. Hinaut nga kamo gyud ang magdayon kay parison ra ba gyud mo.

“Hinuon,” dugay pa man to kay high school pa man ta,” mitimang si Lelio. “Pero, kami gyud ni Nilda ang magdayon.”

Dugay na kadto. Lima ka tuig na ang milabay. Duha na ang mga anak nila ni Lelio ug Nilda ug nagtrabaho si Lelio sa Guam isip usa ka welder. Sukad pa kaniadto hangtud niining higayona wala matibhangi ang pagmahalay sa duha. Mapinanggaon kaayo si Lelio sa iyang asawa ug buotan usab kaayo si Nilda sa iyang bana.

Apan sanglit tagdugay kaayo mouli si Lelio aron mobakasyon ug tungod usab sa kadaghan sa mga tentasyon didto sa Guam, sa hinayhinay napukan ang baroganan ni Lelio. Nadani siya sa pahiyom ni Ligaya, usa ka mestisang Guamenia. Gihubog si Lelio sa kalipay nga lawasnon gikan sa matahom ug mahumot ug batan-ong si Ligaya. Sama sa gilumay si Lelio sa mga romansa sa batan-ong Guamenia, hingpit nga nakalimtan si Lelio ang iyang pamilya.

Bugtong gisaligan ni Nilda sa panginahanglan sa iyang mga anak, mao nalang ang 40% nga allotment sa banko. Wala madugay, may miabot nga divorce papers gikan sa Guam nga gipapirmahan kang Nilda. Ug legal nga nakasal sila si Lelio ug Ligaya sa Guam. Laing lima ka tuig ang milabay, ug usa ka buntag niana, “Uy, Nilda!” Misinggit ang ilang silingan. “Tulog pa gihapon kamo? Bangon na kay nia, miabot ang imong bana.” Daling mibangon si Nilda ug giablihan ang pultahan ug didto nagtindog si Lelio nga daut kaayo ug masakiton.

“Nilda! Mahal kong Nilda! Dayong gakos ni Lelio sa iyang asawa. Wala ka pugngni ni Nilda ang mga luha nga midagayday sa iyang mga aping.

“Lelio! Diin ako nagkulang, Lelio!”

“Wala ka magkulang, Nilda, kundili ako ang nahisalaag. Dawaton mo pa ba ako? Mibakho ang lalaki.

“Mahal ko pa gihapon ikaw, Lelio. Luyo sa tanan, wala makuhai ang akong pagmahal nimo. Kanunay kang may luna sa akong kasingkasing.”

Ug gisaysay ni Lelio ang tanang hitabo. “Bisan siya mikuyog sa lain nga lalaki, wala ko mahinugon kaniya kay wala ako’y gugma kay akong gibilin kanimo ang tanan. Karon nga U.S. citizen na ako, magbakasyon lang ako og usa ka bulan dinhi, mangadto tang tanan sa Amerika kay tuay nagpaabot nakong maayong trabaho didto.”

“Salamat sa Ginoo nga gibalik ka niya ngari kanako,” ug migakos si Nilda sa iyang bana. (Katapusan)