Masahesta

Nakabatyag si Cesar nga wala sa maayong kondisyon ang iyang lawas dihang migawas siya sa opisina usa ka Sabado niana. Si Cesar man gud maoy nahukman sa ilang manager nga patambungon sa usa ka okasyon aron morepresentar sa ilang kompaniya.

Gikan sa iyang gitambongan, mibalik si Cesar didto sa iyang opisina aron pagkuha sa uban niyang mga butang. Mora'g luya gayud ang iyang panglawas. Gipasiklapan niya ang iyang relo ug nakita niya nga alas 10:30 na sa gabii.

Kalit misantup sa iyang huna-huna nga magpamasahe siya sa pamasin nga mawagtang ang kakapoy sa iyang lawas. Gikuot niya ang iyang selpon gikan sa iyang bulsa sa karsones.

Nagpakisayud siya kang Philipp, ang higala niya nga reporter sa usa ka pamantalaan, kun asa ang dapit nga maayong pamasahean. Tuod, wala siya masayup kay suheto kaayo si Philipp sa mga masahean dinhi sa dakbayan.

"Sa Banawa dunay masahean nga nahimutang daplin sa karsada, mga batan-ong chicks ang momasahe nimo, sigurado nga wagtang nang imong kakapoy. Pangitaa lang ang manager kay amigo ko na," tambag ni Philipp.

Misirit si Cesar paingon sa dapit nga gitudlo kaniya sa higala. Tuod, layo pa gani siya nakit-an na niya ang ngalan sa massage parlor nga hinimo sa neon lights nga gilibotan sa mga suga nga nagkidlap-kidlap.

Giparking ni Cesar ang iyang kotse atubangan sa massage parlor. "Palihug ko'g tan-aw sa sakyanan part," giingnan ni Cesar ang gwardya. Pagsulod ni Cesar, misugat sa iyang mga mata ang daghan kaayong mga batan-ong babaye.

Daw siya maoy napunting sa ilang panan-aw adtong higayuna. Nakasabot si Cesar nga pulos kadto masahesta nga nagpaabot og customer. "Minus og customer miss?" pangutana ni Cesar dala ang komedya.

"Sayo pa man gud sir, karong taud-taud daghan na ang mangabut," matud sa receptionist nga miabi-abi kaniya. (Sumpayan)