Maong ania siya karon atubangan sa iyang makinilya. Gipunayan niya’g tulpok ang mga tekla niini. Duna siya’y gitagik. Duna siya’y gimugna gikan sa duga nga napuga sa iyang kaisipan ug iyang gisangga ngadto sa papel nga gitangag sa makinilya. Mao ra kini ang bugtong paagi nga matuman ang iyang damgo. Mao ra kini ang nag-inusarang solusyon aron makahimo siya’g ngalan sa iyang kaugalingon.
Makadaghan na siya mosulay paghimo sa iyang ngalan. Daghan na ang mga abot sa iyang kakugi nga mugna sa nagduhiraw niyang kaisipan nga iya untang ipangahas pagbaligya sa merkado sa katilingbang magbabasa. Apan wala tukba sa seguristang negosyante ang iyang produkto. Giuli kini kaniya nga gipatabanan og mubong sulat nga dili namo magamit.
Nahisagmuyo siya. Nabawo siya sa naangkong kapalaran. Nindot na kaayo alang kaniya ang iyang giisip nga obra maestra. Abot kadto sa gibudlayan niyang mga adlaw ug sa gitukawan niyang mga gabii. Kun siya ang pahukmon, hugot na ug angay ang sista niya sa arte. Bug-at na ang timbang niini sa sukdanan sa kaalam. Apan nahulog sa bung-aw sa kakawangan ang iyang mga paningkamot. Nahibalik kaniya ang abot sa iyang pagpulaw uban ang balibad sa iyang gitanyagan.
Mibati siya’g kalagot. Makadaghan na kini nahitabo kaniya. Nahibalik kaniya ang tanang abot sa kugihan niyang mga takna nga iyang gipadala sa buhatan ni Edito Perfecto kay wala makapasar sa panimpla niini. --- Sumpayan pa