Ang gisabak ni Mariel

Tungod sa kalit nga pag-ulbo sa kagubot sa nasud nga gitrabahoan ni Daniel, napugos siya sa pag-uli sa Pilipinas bisan wala pa matapos ang iyang kontrata. Nahadlok man gud siya nga matanggong unya ilabi na kun mudako gayud ang maong kagubot.

Wala na gani siya makapahibawo ngadto sa iyang batan-ong asawa nga si Mariel ug ingon man ngadto sa iyang mga ginikanan nga mouli na siya. Dinalian man gud kaayo ang iyang pag-uli. Kuyog usab sa uban niyang mga kadugo nga nanagtrabaho usab sa maong dapit.

Sakay sa usa ka bus nga depasaheroan, gabii na kaayo nga nahiuli si Daniel sa ilang dapit. Mingaw na gani kaayo ang tibuok palibot. Hinuon, diha pay pipila ka mga batan-on nga nagtikaw-tikaw sa kadalanan. Nga nagpahimulos tingali sa kahayag sa mga sugang dagitabnon.

Wala dayon moderetso og saka si Daniel sa ilang balay. Naniid una siya, kun duna pa bay nagtikaw-tikaw sa itaas. Namasin siyang nagmata pa ang iyang asawa ug ingon man ang batan-on usab nilang katabang. Nagsuhol man lang gud sila og ikauban ni Mariel diha sa balay.

Unya, mihinay og saka si Daniel sa ila subay sa dakong hagdanan. Gisuwayan niya’g duso ang sera sa pultahan. Apan naka-lock kini ug wala gayud maabli.

Sa dihang manaog na unta si Daniel sa ilang hagdanan, mao usab ang paghiabot ni Mariel kuyog sa ilang katabang. Ug nahibaw-an na lang ni Daniel, nga gikan diay ang duha sa usa ka internetan. Duna man goy mga internetan sa ilang dapit.

Inay malipay si Mariel nga nahiuli na si Daniel, mibasol pa hinuon kini sa naulahi. Gibasol pa niini si Daniel kun nganong miuli kini nga wala pa man unta matapos ang kontrata niini.

Taudtaod gayud ang pag-estambay ni Daniel. Wala man sab gud siya mangitag laing trabaho. Maayo na lang gani kay duna siya’y mga ginikanan nga ilang kadangpan. Alang sa ilang mga panginahanglan. Ilabi na sa ilang mga pagkaon.

Usa ka gabii niana, sa dayon na nila og pangatulog may gisulti si Mariel ngadto kang Daniel nga nakapakurat kaayo sa naulahi. Mitug-an man gud si Mariel ngadto kang Daniel nga nagsabak na siya.

Inay malipay tungod sa gisulti kaniya ni Mariel, mora’g nahasol na hinuon si Daniel. Nakaingon gani siya nga nagtinuod gayud ang iyang katahap ngadto sa iyang asawa. Ug tinuod gayud diay ang mga tabi-tabi nga iyang nadunggan. Nga niduwa og laing team si Mariel.

Ang gitug-an ni Mariel nga nagsabak kini maoy bugtong kamatuoran nga nagluib gayud kaniya ang iyang asawa. Kay unsaon man niya sa pagpamabdos kang Mariel nga baog man pagka lalake si Daniel. (Katapusan)