Naghilak Ako

Gula 5

Karon hinay-hinay na nga nakasabot si Boy kun ngano nga nausab na ang tinagdan ni Beth kaniya.

Kahilakon si Boy nga naglakaw dihang migawas siya sa tindahan. Maayo na lang kay nakatabang ang gisul-ob niya nga sunglasses nga dili makit-an ang nagpuwa na niya nga mga mata.

Gi-delete ni Boy ang contact numbers ni Beth sa iyang selpon. Kini aron dili na siya matintal sa pagkontak sa iyang mabudhion nga girlfriend. Midangop si Boy sa pag-inum-inom. Pirmi na lang siya nga mahubog.

Adto siya kanunay nga magyampungad sa tindahan ni Atty. Chan sa eskena. Usahay gani maagian siya ni Beth apan molingiw si Boy. Dihay higayon nga nakita ni Boy nga gihatud si Beth sa engineer sa pagpauli.

Usa ka hapon, sa wala pa makainom si Boy, nakamatikod siya nga lahi ang nagbantay sa tindahan. Mipalit siya’g usa ka lapad nga ilimnon. “Pirmi na lang lagi ko nga makakita nimo nga hubog,” matud sa babaye nga nagbantay sa tindahan.

Igo lang mipahiyom si Boy. Taud-taud may kaisog na siya nga mitingog samtang giablihan ang botelya sa bino. “Pait kaayo ang akong nahiaguman kay gibudhian ko sa akong girlfriend,” matud ni Boy.

“Ha? Para kana lang unya iangin mo na ang imong ugma? Undang na og hubog-hubog uy, daghan pang mga babaye nga imong makit-an,” matud sa tindera. Mitutok si Boy sa babaye.

Taud-taud, miabot ang babaye nga sagad magbantay sa tindahan. “Day ikaw na sa’y kaon didto, human na ko’g panihapon,” matud sa tindera. Milakaw ang babaye nga gikahinabi ni Boy.

Nahibaw-an niya nga anak diay ni Atty. Chan ang maong babaye. Usa kini ka architect sa construction company. “Guwapa siya no? Unsay iyang ngalan day?” gipangutana ni Boy ang tindera.

“Almera ang iyang ngalan, Almera Chan,” mubo nga tubag sa tindera. Wala madugay, misulod pagbalik sa tindahan si Almera. “Mer, salamat sa imong pagtambag nako, dia iyabo nako ang bino nga akong gipalit,” dayong huwad ni Boy sa alak.

Nagkahigala sila si Almera ug Boy. “Uy, engineering diay ang nahuman nimo nga kurso? Take og exam kay dunay examination nga anhi ra sa Cebu City himoon,” giingnan ni Almera si Boy.

Gihikay dayon ni Boy pagkaugma ang iyang mga papeles pag-take niya’g exam sa Professional Regulations Commission. Gikan si Boy nga nangaplay og trabaho. Mihapit siya sa tindahan nilang Almera. (Sumpayan)