Gula 11
“Nadisgrasya si Chito, Mayor,” makapakugang nga taho ni Inting. “Dia siya karon sa tambalanan.”
“U-unsa?” milagaak daw lipak ang iyang tingog.
“Gipaak siya sa mga putyokan sa among pagpangayam sa lasang sa Punta,” tubag-asoy ni Inting. “Iyang natandogan ang balay sa maong mga mananap sa among pagsuot sa lasang. Gikuninitan siya sa daghang mga putyokan ug nakaangkon siya’g daghang pinaakan.”
“Punyeta!” Mao ray nalitok sa mayor.
“Mao kanay hinungdan nga gidali ko siya pagdala sa ospital sa atong lungsod, Mayor,” gikan na usab ni Inting. “Nag-agungoy siya sa tumang kasakit.”
“Paabota ko diha, Inting,” sa mayor nga nagpangusmo. “Moanha ako karon dayon.”
Gipusdak niya ang awditibo. Sa laing higayon, giluwatan niya ang laing pangusmo aron pagpahungaw sa nag-alintabo sa iyang dughan.
“Kuyog kanako, Hepe,” nagkanayon ang mayor dayong tindog. “Adtoon nato si Chito sa tambalanan.”
“U-unsa man diay nahitabo kang Chito, Mayor?” ni Max pa.
“Gipaak kuno sa daghang putyokan kay iyang natandogan ang balay sa iyang pagpangayam,” maoy tubag. -- Sumpayan pa