Mahadlok mahibaw-an nga dili na siya dalagang ulay

Karon nga nahibaw-an mo na ang tanan sa akong pagkababaye ... Tinong, dili mo kaha ako ipanabi sa atong mga silingan ning atong balangay sa Pitalo?” ni Ines pa nga nagpamahid sa iyang mga luha nga nanglugmaw sa iyang mata.

“Mao kini ang bugtong hinungdan ... kun ngano nga bisan nahigugma ako kanimo ako lamang gihapon nga gipanghimakak nga bisan gamay na lang dapit sa akong kasingkasing wa kay luna nga angay kong higugmaon!”

Igo lamang naghinuktok sa Tinong nga nagpaminaw sa gisulti karon kaniya ni Ines, ning unang gabii ... human sa ilang kasal.

Tulo gud ka tuig siya nangindahay sa gugma ni Ines. Pulos pamalibad sa dalaga sa katarongan nga bisan gamay dili gayod kuno mopitik ang iyang kasingkasing kaniya.

Taliwala sa taudtaod nga kahilom ... may pipila ka pulong nga migawas sa baba ni Tinong diin siya nagkanayon:

“Ngano man tuod akong mahal nga Ines nga makaako sa pagbulgar sa matuod mong pagkababaye ... nga ikaw dili na ulay, ug segunda mano na lang sa imong kinabuhi nga asawa ko na man ikaw?”

Takulahaw mibanos na usab ang nagbuy-od nga kahilom. Nagtinutokay silang duha ug hugot kaayo nga nagginaksanay.

“Biktima lang ako sa pasalig ni Bartolo, ang lalaking minyo nga maoy unang nakasapli sa gihay sa akong pagka-bulak!” mibakho na usab si Ines.

“Angay mong hisayran Ines nga wa akoy labot sa imong kagahapon ug andam ako modawat sa hubo nga kamatuoran!” sagol kanguhal ang sinultihan ni Tinong.

“Salamat Tinong nga gidawat mo lang gihapon ang akong pagkababaye nga napusgay na og laing lalaki!” ni Ines pa nga nagkahugot ang iyang ginaksan sa hawak ni Tinong.

“Ning unang gabii human sa atong kasal Ines, tition ta ang kataposang lawog sa atong kahidlaw sa tumang katagbawan!” ni Tinong pa nga nagpanikad ang sobrang kahigwaos.

Mao na lamang ang nabatian sa mga silingan sa bag-ong magtiayon ang linugapak sa sawog nilang kawayan ug way hunong ang inuyog nga lupig pa ang kakusog sa linog.

Alang kang Tinong, mao diay kini ang hinungdan kun ngano nga dugay siya sugta ni Ines sa iyang gipangindahay nga katim-os ug kadalisay sa iyang gugma ... kay mahadlok diay si Ines nga mahibaw-an ang tanan ...nga siya nadimdiman na diay og laing lalaki nga maoy nakapahunlak sa iyang pagka-ulay.

Way kabutangan karon sa kalipay ni Tinong. Bahala na lang kun ikaduha na siya sa kinabuhi ni Ines, basta iyang napanag-iya ang maong babaye nga natingban sa iyang pagmahal. (Kataposan)