Gula 10
Makabungog nga kasaba ang sinugatan nga gihatag ni Mayor Antigua kang Max sa pagsulod niini sa iyang buhatan. Namula ang aping niini nga daw naigo sa tamparos sa linalang sa dakit. Apan wala gayod motukol si Max, daw piso nga nahumod sa ulan nga nagkiyugpos ang mga pako.
“Way mapili ninyong tanan, Hepe,” labaw pa sa paring Katsila nga nagsermon ang mayor. “Nagpadaog lang kamo sa mga musimos!”
“S-sa ako nang gikaingon, Mayor,” ni Max pa nga naingon sa usa ka manok nga gidungoy, “daghan kaayo sila. Dili kami magsilbi sa ilang gidaghanon. Sila usab ang nakapabor kay ilang teritoryo ang among gitaak.”
“A, binuang,” sa mayor pa. “Ingna hinuon nga mga talawan mong dagko!”
Wala motingog si Max. Miduko kini sa iyang atubangan, daw mitahan sa kaugalingon aron upawan siya’g kasaba.
Diha pa untay isulti si Mayor Antigua apan mibagting ang telepono sa iyang atubangan. Iyang gipunit ang awditibo ug gipaod sa iyang tuong dalunggab.
“Hello!” dako og dahunog ang iyang tingog.
“Si Inting ni Mayor,” mipaila ang nanawag. “Ang barkada ni Chito.”
“Unsay tuyo mo kanako?” gahi ang iyang pangutana. “Hain si Chito?” -- Sumpayan pa