Ang lawak nga bakante

Domingo. Ala una sa hapon. Nahibilin si Dino sa balay nilang giabangan kay nagsigi pa siya’g review para sa board exams pagka-CPA. Iyang kapikas nga si Ingrid ug duha ka anak nila nga sila si Michelle ug Abigail, tua sa balay sa iyang ugangan. Nanan-aw og telebisyon. Naa pa sa kinder si Michelle. Ug si Abigail sa nursery. Nadaut ilang telebisyon. Ug giparepair pa.

Sa pagsugod og puyo nila ining balaya, may silingan nga nipahibawo nila nga haunted kono ning balaya. Apan wa nitoo si Dino.

“Di man ko matootoohon,” niya pa ngadtong Tony nga nagpuyo luyo sa munisipyo sa Victuro.

Duha na kono ka tuig nga way nagpuyo ining balaya. Ug daghang mga tawo nga makakita og lalaking magbarong magabii nga mosulod sa balay nga sirado ang pultahan. Molapos lang kono ang lawas sa tawo sa bongbong o pultahan.

Wala magpa-enrol si Dino og formal review class. Namalit lang siya og hitsas nga mga libro nga reviewer. Nag-self-review lang siya.Kay busy kaayo siya sa iyang trabaho. Ma-Sabado’g Domingo lang siya makalugar og basa. Unsaon, sigi mang overtime sila ug iyang mga kauban sa trabaho. Checker man siya sa bodega sa Uniroyal Shipping Lines.

Naa ra siya magbasa sa sala nga dako og wanang. Kay dako ang balay ug may duha ka dagkong lawak, usa lang ka lawak ang giabangan nila. Ang lawak nga ikaduha nga pabor sa kusina. Ang unang lawak nga pabor sa pultahan mayor, sirado. Way nag-abang.

Dinhing lawaka kadaghan na makadungog si Dino og mga kasikas ug hugangkol. Wa lang kaayo siya mahibulong. Kay wa man siya’y nakita.

Apan karong hapona, duna siya’y namatikdan. Nakadungog siya’g hagok sa tawo.

“May gipakatalog siguro si Noy Andoy sulod sa lawak nga bakante,” tuaw ni Dino sa hilom. Daghan mag masugo nga pag-umangkon si Noy Andoy, tag-iya sa balay. Kay daghang mga tanom sa halaman ug hardin nga naglibut sa balay, kada buntag ug hapon may moanha nga mamisibis sa mga tanom. Kun dili si Soso, usahay si Talolo. Panagsa, mangunay gyud si Noy Andoy sa pagpamisibis sa mga tanom.

Gikalimtan lang sa buot ni Dino ang hagok sa tawo gikan sa bakanteng lakaw. Daw gisira niya iyang dunggan aron maka-concentrate siya sa iyang gibasa. Dugay’ng nawala ang hagok.

Unya pagka alas kuwatro sa hapon, nipuli ang lagapak sa bongbong sulod sa maong lawak. Ma-imagine ni Dino nga daw gipatiran og kabayo ang bongbong. Natural, wa man gyuy kabayo sulod sa sa lawak. Dili gyud to kabayo.

“Kuan tingale, dunay lumber nga gisandig sa bongbong. Unya nidailos sa semento nga sawog. Ug nilagapak sa bongbong ug sawog pagkahagsa sa ubos,” rason niya sa kaugalingon.

Nahuman na lang siya’g basa sa usa ka libro sa Auditing, wa gihapon nipauli iyang kapikas ug mga anak. Alas singko na sa hapon, sa pagtan-aw niya sa iyang relo de pulso. Nituyhadtuyhad siya’g kadiyot. Nanghuyatid. Unya nakita niya sa gawas nga si Noy Andoy namisibis sa tanom. Iyang gihuwat nga makahuman og pamisibis aron mapangutana niya mahitungod sa lawak nga bakante.

“Noy Andoy, kinsa may imong gipakatulog sa lawak bakante ganiha? Duna may kusog kaayong naghagok didto,” ni Dino dihang padulong nas Noy Andoy sa gawas nga gate sa balay nga way trangkatrangka.

“Wa man koy gipakatulog diha,” ni Noy Andoy nga nilingi ni Dino. Namahid ang tiguwang og panyo sa iyang agtang kay gipaningot.

“Dunay mga lumber sulod sa maong lawak, Noy?” dugang ni Dino.

“Wa gihapon. Hawan kaayo nang lawaka. Bisag motan-aw pa ka” ni Noy Andoy nga nikuot sa bulsa sa iyang maong nga short pants. Nipagawas og yawe unya nilakang padulong balik sa balay. Nisunod si Dino sa tiguwang.

Nakita ni Dino nga kinandadohan ang maong lawak. Giyawehan sa tiguwang ang kandado. Gitangtang ang kandado ug gi-ablihan ang pultahan. Nisugat sa panan-aw ni Dino ang hawan kaayong lawak. Way lingkuranan, katre o lamesa. Way mga butang nga nasikit sa bongbong. Wa katingog si Dino. Ug nakahukom nga pahibaw-on niya iyang kapikas sa iyang laraw nga mamalhin sila’g puyo inig abot nila. (Katapusan)