Dagadagahon

Domingo sa buntag. Sulod sa panimalay sa managtiayon. “Unsa man ka, Langga?! Sige diay gihapon kag chat-chat anang imong ex-boyfriend?” ni Dindo ngadto’s iyang kapikas nga si Nirva. Gipakita sa bana ang selpon nga may text message ni Gerry nga nagpasalamat nga nakadawat og load gikan ni Nirva. “Langga” ilang tinawgan sa usa’g usa.

“Pinangga pa man gyud nimo imong boyfriend. Kay imo mang gilibre og load,” dugang ni Dindo. Naurong si Nirva sa iyang pakig-chat og laing higala sa facebook, sa laptop ibabaw sa lamesa. Gilingi niya iyang bana. May kaulaw ang pahiyom ni Nirva ngadto’s iyang bana.

“Langga, ako lang nang gitagad. Gikalooy kay naa man god sa prisohan,” ni Nirva. Gikuha iyang selpon nga gigunitan sa bana. Gibiyabiyaan man lang niya ang maong selpon sa ilang lawak.

“Akong hangyo nimo, hunonga na ang pagpakig-communicate anang tawhana. Dili man ni selos ang ako. Kay nahibawo kong wa gyud na kahilabot nimong tawhana. Ang ako lang nga wa ka kaatiman sa atong duha ka anak. Tibook adlaw ka nalang anang internet. Maayo ra ba’g makasapi ka ana. Gasto lang sa panahon, kuwarta ug kahago” ni Dindo. Nahisagmuyo si Nirva.

Usa ka magtutudlo sa saring publiko si Dindo. Si Nirva call center agent. Apan gipaundang ni Dindo sa trabaho sukad nanganak. Tungod sa pagpangga ni Dindo sa iyang kapikas, di niya hagoon. Bata ra iyang atimano non. Ang panglimpiyo sa balay, pangluto ug panglaba, giako ni Dindo. Apan bisan niini, hitaligam-an gihapon ni Nirva ang pag-atiman sa mga anak nila. Kay maglabi iyang oras sa internet. Hatagan la’g duwaan ang mga bata. Bisag magperhuwesyo usahay.

“Nahadlok man gud kong makahunahuna unyag dautan si Gerry batok sa atong pamilya” ni Nirva.

“Ha?! Kuyawa gud ana! Unsa man diay na siya?” ni Dindo.

“Miyembro na siya’g frat. Tulo nay iyang gipatay sa kontra nila. Life sentence na na siya sa bilanggoan. Basig magsugo unya siyag higala sa gawas. Pahilabtan ta” ni Nirva nga may kahadlok ang hitsura.

“Duna siya’y mensahe nimo nga gihulga ka? Sultihi ko!” ni Dindo. Nangugat. Nanigang mga mata.

“Wa man hinoon,” ni Nirva. “Puwes, undang na sa pakig-chat niya. Pahibaw-a ko kun manghulga. Kay i-report ta dayon na sa warden!” ni Dindo.

“Sige, langga” ni Nirva. Gipawong ang laptop. Gisira. “Tua o. Nagmata na si Earla, atong puya. Nagpangita na tog totoy” ni Dindo nga nitudlo sa ilang lawak. Nitindog si Nirva ug nilakang padulong sa ilang lawak.

“Ayaw nag chat-chat anang imong ex. Abi pa lang niya, dagadagahon lang gihapon ka” ni Dindo. Tua na’s sulod sa lawak si Nirva. (Katapusan)