Disiplina

Naghinuktok si Pastor Dindo Inso sulod sa iyang buhatan human nakabasa sa sulat ni Atty. Saul Inoc. Domingo ron sa buntag. Ang iyang opisina nia sulod sa ground floor sa simbahan sa Divine Mercy Ministry nga nia ra sa maong building sa Divine Mercy Academy.

Ang sulat sa abogado mahitungod ni Peter Largo, grade one pupil, anak sa iyang mga kliyente nga managtiayong Ingrid ug Nestor Largo. Nahulog ang bata sa hagdan. Nabun-og. Nasamdan. Unya wa nadapati og first-aid kay way klinika ang maong eskuylahan. Wa say nurse o guidance counselor. Nakagasto ang ginikanan og usa ka libo ka pesos sa pagpa-X-ray sa ulo sa bata kay nabunal ang ulo. Ang hinungdan nga nahulog ang bata kay samtang nagsaka sa hagdan, gidasmagan og mga dagkong mga bata (mga estudyante sa grade six) nga nagdinaganay nga nagginukdanay. Way batang naimbistigar o nanubag nga maoy sad-an sa hitabo.

Nagtudlo ang maong eskuylahan og Nursery, Kindergarten ug Elementary School. Ang Pastor mao ra say Principal. Ang mga opisyales sa simbahan, mao ra say mga magtutudlo lakip na ang Pastor. Dako ang bilding sa eskuylahan. Apan wa lagi playground. Upat ka andana ang bilding. Sa basement naa ang parkingan sa mga sakyanan sa mohatud o mokuha sa mga estudyante. Ang ground floor mao ang simbahan. Sa ikaduha ug ikatulong andana naa ang mga classrooms. Ikaupat ka andana ang roof garden diin tua ang bandila sa nasud ug anha sauloga ang flag ceremony ug flag retreat matag adlaw.

Kingas kaayo ang mga bata. Labi na mga grade five ug grade six. Way disiplina. Way mapili. Mga babaye’g lalaki. Mga anak ra man lagi sa mga magtutudlo. Kada human sa flag ceremony o flat retreat magdinaganay ang mga dagko nang estudyante. Sa panahon sa recess, lunch break o bisan unsang bakanteng panahon sa eskuylahan, magdagan-dagan sila, magginukdanay. Gihimong playground ang mga koridor sa eskuylahan. Alaot ang mga gagmay’ng bata nga kasagaran hidasmagan nila. Daghan nang nadasmagan. Nangatumba. Nangapiang. Nangapangos. Si Peter lang ang nagrabihan. Kay nahulog gyud sa hagdan. Daghan nang mga ginikanan ang nangreklamo. Apan way nisulat nga abogado. Kining kang Atty. Inso mao pay una. Ug seryoso na gyud ang mga pulong niini. Gibasa ni Pastor pag-usab ang pinakasakit ug tinood nga mga pulong.

“The school is supposed to be where a child is being molded into a good citizen. It is where the good virtues of a child begins. But it seems that you have not disciplined your pupils. They are belligerent, boisterous and mischievous. The son of my client suffered bruises and scratches in the skins of various parts of his body including the head. Fortunately, he had not suffered broken bones or fractured skull. My clients do not wish to press charges against your school or faculties. Especially, that nothing has been done on your part to investigate the incident to find out who were the older and bigger students responsible. Nobody had admitted any fault and apologized to the victim and parents. They were contemplating of transferring their child to another school to avoid risk of repeating the same incident. But they are discounting that move for the moment because of too much hassle. But a repetition of the same incident may trigger a more severe consequence. Not only that my clients would file charges against your school, but also report your deficiency to the DEPED for proper disposal.”

Nakapanghupaw si Pastor Dindo nga naglingkod atubangan sa iyang lamesa. Ug nidalig punit sa telepono ibabaw sa lamesa kay tawgon niya ang tanang magtutudlo. Makig-schedule siya’g emergency meeting nila. (Kataposan) (Kadtong magbabasa nga gusto’g libreng konsulta, dad-a ning pahina sa sugilanon sa opisina sa tagsulat. Iatol og Sabado sa buntag)