Walog sa mga Luha

Gula 3

Pinadayag na gayud ang pagpangulitawo ni Roger kang Vivian. Nagpakita usab kini sa iyang kabuotan ngadto sa dalagang probinsyana mao nga dali ra nga nabihag ang iyang pagtagad.

“Salamat kaayo nga gisugot na ko nimo Vian,” matud ni Roger nga abtik kaayong nakahawok ngadto sa dalaga.

“Naunsa ka man uy nga mangalit ka man lang og panghawok,” mipalag si Vivian kay wala lagi maanad sa kinabuhi nga syudadnon. Apan gipasabot siya ni Roger nga ang kiss natural lang sa managhinigugmaay mao nga nalukmay ra usab ang nasuko na unta nga probinsyana.

Sanglit kanunay ra man sila nga magkita si Roger ug Vivian, dali ra kaayo nga nakagamot ang pagbati sa dalaga ngadto sa drayber. Dunay mga gabii nga magsultihanay sila sa harden sa balay sa ilang agawon.

Nasuod na kaayo ni Vivian si Roger ug mosugot na gani siya nga gakson ug digoon sa mga hawok.

Dihay usa ka gabii, hapit na ang alas 12. Mikalit pagbunok ang kusug nga uwan. Gikan sa harden nagdinaganay sila si Vivian ug Roger paingon sa grahe aron dili mabasa sa uwan.

“Mikalit ra man ang uwan uy. Adto na ko sa among higdaanan,” giingnan ni Vivian si Roger.

Gipugngan ni Roger ang dalaga nga mihana na unta pagsutoy’g dagan paingon sa kwarto sa mga tindera nga nahimutang sa silong sa dakung balay. Giparaygan ni Roger si Vivian.

“Huwata usa nga motuang ang kusug nga uwan. Dali ari lang ta sa akong kwarto tupad ra sa grahe,” ni Roger pa nga migunit sa bukton ni Vivian.

Kabalibaron si Vivian apan gipaundayonan na lang usab niya si Roger. Mainampingon nga gibuksan ni Roger ang iyang kwarto. “Dili na lang nato pasigaon ang suga kay makit-an unya kita dinhi,” matud ni Roger.

Nakabantay si Vivian nga inay motuang ang uwan, daw nag-anam na hinoon kini kakusug. Kalma nga gigakus ni Roger ang dalaga ug gipakaligo sa daghang mga hawok.

Daw giganuy si Vivian ngadto sa kintolimbo tungod sa kalalim nga iyang gibati.

Gihapohap ni Roger ang iyang kalawasan ug maoy nagsugnib og talagsaong kahinam. (Sumpayan)