Tabog sa Putyokan

Gula 2

Apan nahimo niyang problema ang mga tawo nga nagpuyo sa baryo Punta diin adto tukora ang pabrika. Nagdumili sila sa pagpahawa sa maong dapit nga maoy nahitarokan sa ilang kabos nga mga pinuy-anan. Kasagaran kanila nagpakabuhi pinaagi sa panagat ug pagtikad sa yuta. Bikil ang ilang kabubut-on sa planong pagtukod og pabrika sa ilang dapit.

“Nganong mosupak man gayod kamo?” nagkanayon si Mayor Antigua usa niana ka higayon nga mituyo siya pagduaw sa Punta aron makigsabot-sabot sa mga lumolupyo sa maong dapit. “Alang sa kabulahanan natong tanan kining plano ni Kee Lai Tong. Mouswag ang atong lungsod sa higayon nga aduna nay pabrika dinhi. Daghan na unya ang makabaton og trabaho. Maoy gikasabotan namo nga kamong taga Punta maoy hatagan og prayoridad sa pagpanarbaho sa pabrika.”

“Dili gayod kami mosugot, mayor,” mitubag si Jesus, ang pangulo sa pundok sa mga mananagat. “Daghan unya sa among kaigsuonan nga mga kabos ang maalaot sa higayon nga katukoran na og pabrika kining among dapit. Tinuod nga mipasalig si Kee Lai Tong og trabaho alang kanamo. Apan pila ra man kaha kanamo ang makatrabaho sa pabrika?” Mag-unsa na man lang ang uban nga magpabilin sa pagpanagat? Wala na unya sila’y makuhang isda tungod kay mangamatay na man kini gumikan sa hugaw nga biya sa pabrika nga ibuga sa dagat.” -- Sumpayan pa