Dumuduong

Gula 18

Gipunting na usab niya ang manatad. Apan wala pa gani niya makablit ang gatilyo sa airgun, milupad na usab ang langgam. Mibalhin na usab kini ngadto sa sanga sa laing punoan sa kahoy. Nagpalayo kini og diyotay kaniya. Mora bag igo lang siyang gipaibog niini, sama kang Dalisay nga miislag kaniya.

“Idlas gyud kining langgama, da,” nakaingon siya sa hilom. Gitukbo siya sa tumang kapikal. Apan nahagit ang iyang garbo isip hingigo nga mangangayam. Migantuong ang iyang tinguha pagpunggit sa langgam. Milumpayat ang iyang kahinam pagluthang niini. Dili niya lung-an ang manatad hangtod nga iya kining makuha.

Gipadul-an na usab niya ang gibatogan sa langgam aron kini pusilon. Naglagot na siya nga naghago sa pagsunodsunod niini. Naglungotlungot na ang iyang galamhan. Gipanganti niya sa hilom nga kun makuha na niya ang manatad, mao gyud kini unahon niya’g sumsom agi’g balos sa pagbudlay niini kaniya.

Giinggansa na usab ni Maambong ang pusil de bomba ug gipunting ang langgam. Ang iyang mga mata, dalunggan, kabubut-on, pagbati ug pagtagad didto gitingob sa manatad. Wala gani siya makaalinggat nga may hakot nga natagak gikan sa dahon nga iyang nasaghiran ug mitugpa sa iyang tuong abaga. -- Sumpayan pa