Wala gani dangti og oras nahuman dayon ni Perto ang lit-ag nga iyang gibuhat. Hitsas na man god siya sa tanang mga galamiton, una niya kini sugdi sa paghimo. Dugay naman niya kining giandam.
Human niya og buhat sa lit-ag, iya dayon kining gipahimutang sa usa ka dapit, nga maoy gituhoan niyang agianan sa manunukob sa iyang mga binuhing manok.
Hinuon, wala pa siya makasiguro kun unsa gayud kahay manukob sa iyang mga manok. Apan dako gyud ang iyang pagtuo, nga usa gyud kini ka mangtas nga hayop, sama sa sawa o mga ihalas ba kahang mga iring o iro, ilabi na kay ang buhianan sa mga manok haduol man kaayo sa banwa.
Daghan man kaayong mga kawayanan ug uban pang mga matang sa kahoy ang anaa sa palibot niini.
Napugos man gud sa pagbuhat og lit-ag si Perto, kay kanunay man nga maibanan ang binuhi niyang mga manok. Hapit na lang kada adlaw, nga duna gyuy mawala sa iyang mga manok. Mahibaw-an man god niya kini, kay iya man gyud kining ihapon kun manabod na siya matag buntag.
Sinaboran man lang niya’g mga patuka ang iyang mga manok, bisan tuod og iya gyud kining gikoral og nylon screen. Ug sa pagsabot ni Perto, panahon gayud sa kagabhion ang pagtukob sa iyang mga binuhing manok.
Niana dayong pagkaugma, gitibaw ni Perto ang lit-ag nga iyang gipahimutang sa usa ka dapit, nga maoy gituhoan niyang agianan sa manunukob sa iyang mga manok. Apan sa iyang pagsusi iyang nahibaw-an nga wala gayud kini maunsa. Nagpasabot nga wala gayud kini matandog.
Natingala na lang si Perto, kay sa pag-ihap pa niya sa binuhi niyang mga manok, nakuwangan na man sab ni. Duha pa gani ka mga manok ang nangahanaw. Kadto ra ba gyung duha ka buok mga sunoy nga gihunahunaan niyang himuong hiniktan, para igtatari. Mahilig man sab god sa pagpanabong si Perto.
Misamot ang iyang katingala kay maayo man gihapon ang pagkahimutang sa sera sa gibutangan niya sa maong mga manok. Diha man gihapon ang mubong kabilya nga maoy gihimo niyang trangka sa sera.
Hangtod nga nakahunahuna na lang gyud si Perto nga puktawan na lang gyud niya inigkagabii, ang gibutangan niya sa mga manok. Ug panid-an pag-ayo, kun ngano gayud nga mawad-an man ang iyang mga binuhing manok.
Tuod man nianang pagka gabii, didto na si Perto maghunong haduol sa iyang manukan. Ang tuyo niya mao lang gayud ang pagpaniid. Kun nganong mawad-an gyud ang iyang mga binuhing manok. Nagdala siya og flashlight ug nagtakin pa gani og usa ka mahait kaayong palamingko. Alang god kang Perto, gamit kaayo niya kadtong iyang gipangdala.
Wala madangti og dugay, nakabati dayon og kanaas si Perto. Ug unya, iya usab nga nalantawan nga morag may tawo nga naghinay-hinay sa pagduol sa iyang manukan. Unya ang maong tawo midalig kuha sa mubong kabilya nga maoy gihimong trangka sa sera sa pultahan diin mahimutang ang mga manok.
Ginamit ang flashlight, giiwagan dayon ni Perto ang maong tawo. Mao gyu’y iyang gipuntariya ang nawong niini, aron sayon ra kaayo siya pag-ila kun si kinsa kini.
Daw dili makatuo si Perto sa iyang nakita. Wala gayud siya magdahom, ang manunukob diay sa iyang mga manok dili diay hayop, kun dili usa ka tawo. Ug mao pa man gani kini ang nagsugyot kaniya kang Perto, nga pahimuon siya’g lit-ag, aron madakpan gayud ang manukob sa iyang mga manok. (Kataposan)