Dear Tita Salie,
Have a wonderful day. Hope you are in good health always. Just call me Eric, ulitawo ug duna ko’y trabaho. Ganahan gyod ko mobasa sa imong column ang pasabta. Malingaw lang gyod ko sa imong mga tambag. Mao nga ganahan pod ko nga tambagan nimo.
My problem is about my love life. Duna ko’y uyab, Tita ug love gyod kaayo nako kining bayhana. Ang problema lang gyod kay minyo na siya ug duna 2 kabuok mga anak. Pero matud niya nga wala na kuno siya’y gana sa iyang bana ug wala nay klaro ang ilang pagpuyo tungod kay magsige na lang sila og away.
Matud pa niya nga malipayon kaayo siya kun ako ang iyang kauban, ug mao usab kini ang akong bation sa panahon nga kauban nako siya. Nagminahalay gyod mi sa tinuoray, Tita. Ang problema lang kay duna na siya’y tag-iya. Mao kini ang akong gikalibogan karon. Unsa may angay nakong buhaton? Palihog pasabta ko. Thank you so much and more power.
-- Eric
* * *
Dear Eric.
Nganong gusto ka man gyod og problema nga puyde ra man unta kang magpuyo nga malinawon ug walay hunahunaon nga suliran? Mas gusto ba gyod nimo ang kinabuhing problemado?
Nasayod kana nga minyo ang maong babaye apan imo gyod siyang gitental. Gusto ba nimo nga hasta siya maglisod sa iyang kinabuhi. Gusto ba nimo nga hasta siya maglisod sa iyang kinabuhi tungod kay anaa siya’y pamilya? Wala ka ba maluoy sa iyang mga anak kun ugaling masakpan siya sa iyang bana ug ikaw ang hinungdan sa ilang pagkabungkag.
Bisan pa man kun ikaw ang makahatag kaniya og kalipay, bisan pa man kun nahigugma ka pag-ayo kaniya apan dili gyod kini igo aron maguba nimo ang kamatuoran nga ang imong girlfriend usa ka minyo.
Busa ayaw samoka ang samok nang daan niyang pagpuyo. Kay mas mosamot hinuon nga bati na kaayo ang iyang pagtan-aw sa iyang bana, mas mosamot pa hinuon og kawala ang gana sa imong uyab ngadto sa iyang bana kay anaa ka man magsige og palami kaniya.
Busa, ikaw man ang lalaki, gamita ang imong pagkalalaki ug tabangi siya aron monindot ang ilang kaminyoon. Instead nga imo siyang danihon tabangi hinuon siya nga mohapsay pagbalik ang ilang pagpuyo. Ayaw himoa ang imong kaugalingon nga maoy hinungdan sa ilang kagubot.
-- Tita Salie