Di papangga sa anak

Ilugar lang ko, Dong Roger. Anhi ra ko manaug!” sa Papa Tony ni Roger nga naglingkod sa front seat sa kotse sa anak. “Asa man gyud ka Pa? Kay ihatud tika” ni Roger nga naglingi sa amahan. Nia na ang abuhon nga Toyota Corolla ni Roger sa eskina sa mga dalan M.C. Briones ug A.S. Fortuna. Gikan sila sa lungsod sa Catmon diin managsilingan ang amahan ug anak.

Padulong si Roger sa iyang opisina nga Accounting Firm sa Banilad, Mandaue. Alas siyete pa ron sa buntag. Wa pa kaayoy trapik. Alas singko y media sa buntag paggikan nila sa Catmon. Niurong pa ang sakyanan kay pula pa ang traffic light.

Sitenta nay edad ni Noy Tony. Napulo ka tuig nang biyudo. Retirado siya nga drayber og bus. Pensiyonado siya sa SSS ug GSIS kay nakatrabaho isip drayber sa ambulansiya sa ilang lungsod og dugaydugay. Naa pa gyuy binulan nga honorarium kay konsehal siya sa barangay Guachil. Independente kaayo’g kinaiya tawhana. Mga propesyonal na iyang tanang lima ka anak. Unya dili gyod mangayo’g pabor sa iyang mga anak. Bisan hayahay na sa iyang mga anak, siya gihapon ang maghataghatag nila. Dili siya gustong makahasol sa iyang mga anak.

Si Roger iyang kamaguwangan. Naminyo og magtutudlo sa saring publiko. Gipabalay niya atbang sa iyang balay. Ang ikaduhang anak si Myrna. Nakahuman og Banking and Finance. Nakatrabaho og banko. Naminyo og kauban ra niyas trabaho. Gipabalay niyas Myrna luyo sa iyang balay. Ikatulong anak ni Maricor. Nakahuman og Customs Administration. Apan wa nanarbaho. Kay naminyo og Amerikano. Gidala sa Amerika. Ikaupat nga anak si Gina. Nakahuman og Accountancy. Apan wa nag-CPA. Naminyo og German. Tua nas Germany namuyo. Ang kamanghuran si Tony Jr. Nakahuman og Criminology. Wa nagpulis. Pero sekyu sa banko. Naminyo og Nurse. Tua ra nagpuyo sa silingang baryo, sa Hikuli.

Wa na hinoon nagsalig niya iyang mga anak. Apan wa sab siya magsalig nila. Pero di gyud kalikayan nga maagian siya sa karsada nga mag-atang og sakyanan. Natural nga ang anak mopasakay gyud sa amahan. Apan nibalibad unta si Noy Tony nga gihunongan ni Roger.

Sa gagmay pa iyang mga anak unya nagsakitsakit iyang kapikas nga si Chona kay may dayabitis, nakawot niya ang dili katol. Ang iya lang gipangandoy nga dili magbulakbol sa pagtungha iyang mga anak.

Grabe ang naagian ni Noy Tony nga kalisod. Sa panahon nga day-off siya pag-drayeb, di siya mag-urong. Mangahoy siyas bukid aron makabaligya’g sugnod ug malibres gamit. Mamanday usahay siya. Manghimog lamesa, lantay, mga lingkuranan ug cabinet kun duna magpahimo. Manginhas usahay siya para makalibre’g sud-an. Apan kun swertehon, makapamaligya sab. Namuhag sab siya’g dugos sa putyokan. Kadaghan siya kapamaligya’g binotelya nga dugos. Nagamit tanan niyang nakamahuan sa pag-sideline. Nalipay lang siya nga nagbunga gyud og maayo iyang paghago sa iyang pamilya.

“Dinhi lang lagi ko. Kay duol na man kos akong adtoan. Lahos na lang sa imong opisina” ni Noy Tony.

“Asa man lagi ka. Kay ihatod tika. Bida sab nimo. Mahibulong man lang ko nimo. Nga mora’g isipan ka man kaayong pagkatawo. Gusto lang kong makabawos sa imong kaayo namo nga imong mga anak” ni Roger.

Nakapanglab-ok og laway si Noy Tony.

“Di lang unta ko gustong may masayod sa akong lakaw. Sekreto man god ni akong lakaw” ni Noy Tony. Minghoy.

“Duna diay kay pamisitahan Pa?” ni Roger. Nipahiyom.

“Dili. Importante ni akong lakaw” ni Noy Tony.

“Kun importante man kaha, ihatud tika” namugos si Roger.

“Adto bitaw kos Chong Hua. Sa klinika ni Dr. Pilaso. Kay naa koy gipamati. Pa-tsek-ap ko” ni Noy Tony. Subo ang nawong.

“Labi pang angay’ng ihatud tika Pa. Ug kuyogan pa gyud. Bahala’g di ko mangablis opisina rong adlawa” ni Roger.

“Ayaw na lang Dong Roger. Hasul na kaayo na nimo” balibad sa amahan.

“Naunsa ba ka Pa?,. Di gyud diay ko nimo tagaa’g higayon nga mo pangga nimo? Higayon na ron Pa, nga kaming imong mga anak mopakita og pagpangga nimo. Agig bawos sa imong pagpangga namo” ni Roger. Nitutok sa amahan. Namulang mata.

“Na hala. Ikaw god” ni Noy Tony. Nakapahiyom. Niberde na ang suga. Talagsaon nga pagkatawo si Noy Tony. (Katapusan)