Senior Citizen na si Agata

Senior citizen na gyud diay ko apan batan-on pa man ang akong hunahuna kay makahinumdum pa man ko hangtud ron kadtong mga panahon sa akong pagka batan-on, nakatuaw si Agata usa ka buntag niana samtang nag-atubang siya sa samin. Mipadayon siya. “Maayo kong mosayaw sa hayskol pa ko niadto sa “You’re Sixteen” ug sa “Young Girl” nga mga tugtog sa baylehan nga sikat niadto.

Saysenta anyos kapin na si Agata ug makita na ang mga kunot-kunot sa iyang nawong ug agtang.

Napulo na ka tuig siyang nabiyuda. Dagko na ang iyang mga apo sa tulo ka buok anak babaye niya sa kang Poldo nga mitaliwan na sa laing kalibutan gumikan sa inom ug sa pagkahinabako niini.

Malipayon kaayo si Agata ning adlawa kay mokubra na siya sa tres mil ka pesos nga malabo isip “financial assistance” sa City Hall.

“Uy Agata, kumusta!,” dihay mikablit niya samtang nagpaabot siya sa iyang turno sa pagdawat sa kuwarta.

Sa pagyahat niya maoy misugat sa iyang mga mata ang pamayhon ni Duro nga nagngisi sa kahimuot.

“Buhi ka pa diay, Duro? Abi nako’g patay ka na sa pagpangligid sa panahon!” pinabundak ang tingog ni Agata ug dayong paturatoy sa lamesa sa “paymaster” aron pagkubra sa iyang salapi.

Kini ugod si Duro unang uyab ni Agata kaniadto, apan unsa mang pagka unsaa nga gipulihan man siya sa kang Digna kay gipakaslan man gyud niya.

Mao tong pagkatapos niya og kobra, nagdali siyang milakaw kay gilikayan niya si Duro apan giagpas siya niini.

Samtang sige silang lakaw namahayag si Duro, “Agata, hikalimtan nato ang kagahapon ug maoy atubangon nato ang ugma. Biyudo na ko. Lima na ka tuig nga namatay si Digna. Wala nay makababag kanatong duha.”

“Pag solo diha’g imo Duro. Pulos na ta mga walay ata ug wala nay ikabuga pa. Kun sa adlaw pa kita, talisalop na! Hinugay na anang imong mga binuang ug guwatsi”, pintok nga mga pulong ang gibuhian ni Agata.

Mipara si Agata og taksi ug dayong sakay niini biniyaan si Duro nga masulub-on ug igo lang siya sa pagpanghupaw nga nagkanayon sa hilom, “Nagdumot pa gyud diay si Agata kanako!” (Katapusan)