Wala nay kontak

Dear Tita Salie,

Good day. I am an avid fan of your column ang “pasabta.” I really like the way you give your advice ngadto sa mga senders. You are very practical and realistic. Mao nga naengganyo pod ko sa pagpadala sa akong suliran. Hoping that you would help me bisan mga suggestions lang, Tita, concerning my problem.

By the way, tawga lang ko og Maricel, am still single, but I have a relationship w/ my boyfriend for about four years na. I really love this guy kay buotan kaayo siya ug pinangga gyod ko niya. Ganahan pud ko niya kay duna man siya’y plano sa kinabuhi ug iya gyod kong iapil kanunay sa iyang mga plano. Apan ang ako lang gikalibogan niya kay labihan ka seloso, ug segurista pa gyod kaayo. Kun molakaw ko iya gyod i-make sure nga wala koy laing kauban kay mahadlok ko nga madala sa akong kauban ug maka-meet og laing lalaki.

Tungod sa iyang pagkaseloso nagkabulag mi ug wala pa mi kontakay hangtod karon kay nasuko man ko niya. Apan ako man gyud nga na-realize nga love man gyod nako siya og gimingaw na ko niya. Mao kini ang akong problema, Tita. Makigbalik pa kaha ko niya ug agwantahon na lang nako ang iyang pagkaseloso? Palihug pasabta ko. Daghang salamat and God bless. -- Maricel

* * *

Dear Maricel,

Ang pangutana kun imo bang maagwanta ang iyang pagkaseloso? Kay kun dili gyod nimo makaya ang iyang batasan muabot gihapon ang panahon nga mapuno na pud ka niya ug maglisod na ka sa pagpakigbulag tungod kay minyo namo ug duna nay mga anak. Tungod sa maong sitwasyon mapugos na lang ka ug mag-antos na lang sa iyang kaseloso sa tibuok nimong kinabuhi.

Mas maayo seguro nga imong gamiton kining maong sitwasyon nga lagyo pa mo sa usa’g-usa. Gamita ang maong space nga anaa kaninyo karon. Hunahunaa pag-ayo kun makaya ba nimo nga wala siya. Hunahunaa usab kun anaa siya apan perti ka seloso ug tan-awa kun hain ang mas sayon alang kanimo. Tan-awa kun asa niini ang malipayon ka. Maoy timan-i nga kausa ra ta moagi niining kalibotana, busa, paningkamot nga dili pulos pag-antos ang imong masinati.

Kun mobalik siya pagpakigsulti kanimo o mobalik siya’g panguyab kanimo isulti kaniya ang iyang batasan nga dili nimo mauyonan ug pangutan-a siya kun kaya ba niya kining bag-ohon. Hatagi siya og mga condition aron dili namo magbalikbalik pa sa mao gihapong isyu. Pangutan-a siya kun may pagsalig na ba siya kanimo aron dili na siya magsige’g selos. -- Tita Salie