Nataligam-an

Nakiha og 20 ka kasong ESTAFA si Olga Nunez binalaye ni Mr. Ben Nunez. Si Mr. Nunez mismo ang com-plainant. Unsaong kompiyansa kaayo siya sa iyang umagad. Wa niya gipiyal sa iyang asawa o mga anak ang paghikay sa mga papeles sa iyang yuta. Kay di siya gustong maghikutar iyang pamilya sa iyang kabtangan. Kun mangutana gani niya si Hilda iyang kapikas, dispatsahon dayon niya sa pag-ingon “Buhi pa ko. Ako una ang magbuot sa akong kabtangan!” Mahilom iyang kapikas.

Istrikto kaayo si Ben mahitungod sa iyang mga yuta. Ang iya ra gyung gipiyalan si Olga nga asawa ni Isaias kinamaguwangan sa tulo niya ka anak. Maong nag-abusar si Olga. Nabiktima gyud hinoon siyas naulahi.

Duna siyay usa ka hektaryang bakante nga luna, residential sa baryo Jucabi ning dakbayan. Gipa-lote-lote niya og tag dos siyentos metros cuadrados. Gipabaligya niya sa iyang umagad. Si Olga ang gipiyalan niya sa pagkuha og surveyor. Gisalig ni Ben tanang mga papeles sama sa titulo, tax declaration, plano sa yuta, technical description ug uban pa. Sa dihang na-subdivide na ang yuta, nagsugod dayon siya’g pamaligya. Gimantala nila sa The Freeman ug Banat News nga duna sila’y mga lote nga gipamaligya. Kusog ang halin sa iyang mga lote kay barato rag presyo. Gani, dili istrikto si Ben sa palit. Mahimong mobayad lag katunga isip down payment. Unya datahan ang balanse balig usa ka tuig.

Nahibulong si Ben nga sikrisika na kaayo si Olga. Mga mahalon na kaayo’g mga gamit. Unya kanunay mobangkag outing sa iyang mga higala ug paryente. Nakuwartahan si Olga. Bueno iya mang pagtagaan og komisyon. Apan boraska ra gyud kaayo iyang ginastohan.

Wa dangtig tuig nibuto dayon ang gibuhat ni Olga. Dunay bayente ka lote nga gibaligya niya. Wa niya pahibaw-a si Ben. Gimadyik ni Olga ang pirma ni Ben. Ang kuwarta nga halin gibulsa ni Olga. Unya nabaniog na sa ilang baryo nga nanglaki si Olga. May uyab batan-ong lalaki. Kay dakong masakiton iyang bana. Nakiha si Ben og specific performance sa mga buyers sa 20 ka lote nga gimadyik ni Olga iyang pirma sa dokumento. Pagkabisto ni Olga nisirit dayon siya’g sibat. Nikuyog sa batan-ong lalaki ngadto sa Mindanao.

Wa magdugay og pasaka og 20 ka kasong ESTAFA si Ben. Iyang gigamit si Atty. Eric Roble. Napasaka sa Prosecutor’s Office ang mga kaso. Nalutsan og 20 ka warrant of arrest si Olga. Gigastohan ni Ben aron madakpan gyud. Dangtag unom ka bulan, naarestar si Olga ug napriso kay way ikapiyansa. Ang 20 ka kaso naasayin sa 20 ka lainlaing branch sa RTC sa Kapitolyo. PAO ang abogado ni Olga. Unya gibasahan siya og kaso sa usa ka branch sa RTC atubangan ni Judge Dante Magno. “Uy yuna pa ra god” ni Judge Magno. “Ma-dismiss man ning kasoha. Exempt man sa criminal liability ang umagad nga mangilad sa ugangan”.

Nanigang mga mata sa Prosecutor, PAO lawyer ug ni Atty. Roble. “Ngano man, judge?” ni Atty. Roble. “Well, I’ll just read to you Art. 332 of the Revised Penal Code. It says “Art. 332. Persons exempt from criminal liability. -- No criminal, but only civil liability shall result from the commission of the crime of theft, swindling or malicious mischief committed or caused mutually by the following persons: 1) Spouses, ascendants and descendants, or relatives by affinity in the same line; 2) The widowed spouse with respect to the property which belonged to the deceased spouse before the same shall have passed into the possession of another; and 3) Brothers and sisters and brothers-in law and sister-in-law, if living together” sa huwes.

Na-dismiss gyud ang tanang kaso ni Olga. Nisibat na sab siya. “Bida! Nataligam-an ko gyud nang balaora. Nakapasar na lang kos bar, karon pa ko kahibawo ana. Bisan ang mga prosecutors, PAO lawyer ug ubang huwes, wa kahibawo ana. Si Judge Magno ra gyud” ni Atty. Roble ngadtong Ben. Nakapangawot na lang sa ulo sa Ben. (Kataposan)

(Kadtong magbabasa nga gusto’g libreng kunsulta, dad-a ning pahina sa sugilanon sa opisina sa tagsulat. I-atol og Sabado sa buntag.