Hapi-hapi sa Bohol - Gula 4

Gikan sa dapit nga daghang tarsiers, mipaingon na sila si Clifford ug Darlyn sa Loboc. Giparada ni Clifford ang kotse daplin sa karsada ug milugsong sila sa naglutaw nga restaurant nga gitungtong sa duha ka motorboat.

Gipili nila ang lingkoranan nga daplin gayud sa tubig. Taud-taud misibog paghinay ang floating restaurant. Nalingaw kaayo si Clifford kay samtang misugod na paglawig ang floating restaurant, gidalitan sila og mga Binisaya nga kanta sa mga singers nga Bol-anon.

Samtang duna'y mga sinugba nga karne nga gidalit kanila, apan naglabi gayud ang mga seafoods nga pagkaon. Dagko kaayo ang pansat nga gisilbi kanila ingon man ang tambok kaayo nga mga lambay.

"Manambok man ta Lyn kun magpirmi ko dinhi sa Bohol," giingnan ni Clifford si Darlyn. Samtang nagpadayon sila sa pagkaon, nabantayan ni Clifford nga dunay mumho nga mipilit sa kilid sa baba ni Darlyn.

Walay langan-langan gikuha kini ni Clifford. "Hala, sori kaayo Clifford ha? Giganahan man gud ko og kaon sa tambok kaayong pansat ug lambay. Ka-sweet 'sab nimo uy," matud ni Darlyn nga mitutok kang Clifford.

"Ingon ana g'yud ang akong batasan ngadto sa mga babaye Lyn, ilabi na sa mga sama kanimo nga maanyag," ni Clifford pa nga nagngisi. Nagkataw-anay silang duha. Taud-taud, midunggo na balik sa daplin ang floating restaurant.

Human mabayri ni Clifford ang ilang obligasyon, nanakay sila balik sa kotse. "Adto ta sa dapit nga gihimoan sa Blood Compact nila ni Datu Sikatuna ug Miguel Lopez de Legaspi. Dayon gusto ka nga moadto sa Bohol Beach Club?" matud ni Darlyn.

"Sure, basta ikaw. Pwede ba ta nga mag-over night sa beach?" dali nga tubag ni Clifford. "Mahimo man, apan madak-an ka sa gasto kay mokuha ka man og duha ka kuwarto para natong duha," matud ni Darlyn.

Nakahuna-huna si Clifford nga komedyahan si Darlyn. "Dili ba pwede nga usa lang ka kuwarto ang atong gamiton? Patuohon nato ang taga beach nga mag-sweetheart tang duha," sugyot ni Clifford kang Darlyn.

"Oki ka ba Lyn?" gisukna ni Clifford ang guwapa niya nga guide. Wala motingog si Darlyn apan nasabot sa ulitawo nga wala kini pagsupak sa iyang gisugyot. "Inig-abot nato sa beach, ipakita nato nga mag-sweetheart tang duha Lyn," matud ni Clifford. (Sumpayan)