Dumuduong

Gula 9

Niadtong tungora, nagsugod na siya’g paninguha sa dalaga. Apan si Dalisay naingog kabaw nga gahi kaayo’g ilong nga hugtanong miayad sa gihalad niyang gugma.

May mga higayon nga aboton siya’g kaputong, makahunahuna siya’g daotan kang Dalisay. Kun dili niya maangkon ang dalaga sa minaayo, angkunon niya kini sa daotan nga paagi. Apan nahadlok siya sa pasidaan sa iyang amahan nga dili kini mokunsinter kaniya sa higayon nga magbuhat siya’g tinonto nga makaduhig og buling sa ngalan niini isip ligdong nga bise mayor sa ilang lungsod. Kini ang nagpugong kaniya pagbuhat sa gilaraw niyang daotan kang Dalisay. Ang pasidaan sa iyang amahan maoy gabas nga midumpol sa iyang sungay. Nasuheto siya sa prinsipyo sa iyang amahan -- dili kini matarog!

Misamot pa gayod hinuon ang kalagot ni Maambong ngadto kang Santino kagahapon sa dihang napilde sila sa basketball. Ang iyang ulo nahimong kaldero nga puno sa tubig nga gidangdang sa kalayo. Mibukal ang kainit sa iyang dugo ngadto kang Santino nga giisip niyang maoy nagdala’g demalas sa iyang kinabuhi. Si Santo gayod ang kanunay niyang kaatbang sa bisan unsang tinguhaon niyang maangkon. Si Santino giisip niyang sungayang anino nga nagsunodsunod kanunay kaniya. -- Sumpayan pa