Hadlok maunhan

Dear Tita Salie,

Maayong adlaw kanunay gyod ko magsigeg basa sa inyo mga article kay makalingaw kaayo. Sa dili pa kami mosulod sa trabaho magsige pa gyod mi og gunit og Banat News labina human sa pamahaw.

Ako diay si Jackie usa ka lesbian. Ania ko nagtrabaho sa Berben diri sa Mandaue. Daghan na ko og gikarelasyon nga mga babaye, Tita, ug may gikatipon nakong mga babaye. Upat na ka buok ang akong gika-live in, apan silang tanan akong gibiyaan. Ako man gong naobserbahan nga magkaanam man sila og ka maldita.

Kun bag-o pa lang ang among relasyon maayo pa kaayo sila nako. Hangtud nga makahukom mi nga magtipon ug kun magkadugay na magkaanam man og kausab ang ilang batasan. Mosukol na man sila nako ug dili na motuo. Maldita na kaayo mao nga magsige nami og away. Busa ako silang biyaan kay dili ko gusto nga akoy maunhan sa pagbiya.

Karon duna na pod ko’y gikarelasyon nga usa ka babaye. Mahal kaayo nako ning bayhana ug nasayod ko nga mahal sad kaayo ko niya. Apan ang problema kay minyo man siya.

Unsa kahay maayo nakong buhaton? Palihog pasabta ko ug tambagi sa angay nakong buhaton. Thank you very much and more power. -- Jackie

* * *

Dear Jackie,

Sa akong tan-aw spoiled kaayo ang mga babaye nga imong gikatipon o gikarelasyon. Sobra-sobra seguro ang imong pagpangga kanila hinungdan nga magsalig sila nga mosugot ra ka bisan unsay ilang buhaton, bisan pa kun ila kang abusaran. Dako ang ilang pagtuo nga tungod sa imong dakong gugma kanila imo ra gihapon silang sabton nga igo ka lang magpaubos ug agwantahon ang ilang kamaldita kay ingon gyod niini ang kasagaran nga mahitabo, kun sobra ang imong ka maayo ug kabuotan dako ang posibility nga ikaw abusaran. Ato kining makita dili lamang sa manag-uyab kundili sa manag-higala, sa mga anak ngadto sa mga ginikanan, sa mga empleyado ngadto sa ilang boss ug uban pa.

Sa imong bag-ong relasyon karon mag-amping ka kay pamilyado ang imong uyab ug dunay bana. Basin unya kun masayod ang iyang bana. Dili seguro maayo nga ipadayon kanang inyong relasyon kay dunay pamilya nga argabyado. Dunay pamilya nga posibleng maguba sa panahon nga mabulgar ang inyong sekreto. Ayaw itugot nga usa ka sa mga hinungdan nga mabungkag ang ilang pagpuyo. Busa pangita og relasyon diin kamong duha pulos gawasnon. Tungod kay natural lamang ang mahigugma, buhata kini sa paagi nga malipayon ka ug wala kay tawo nga giagrabiyado. -- Tita Salie