Hapi-hapi sa Bohol

Gikan sa opisina ni Clifford klaro nga makita ang kabukiran sa Bohol, ilabi na ang Chocolate Hills sa lungsod sa Carmen, kun maayo ang panahon nga walay dag-um ug panganod nga magsalimbong sa kawanangan.

Nakahuna-huna si Clifford nga moadto sa maong lugar sa Bohol mao nga miaplay siya og napulo ka adlaw nga vacation leave sa iyang gitrabahoan nga kompaniya. Gitumong ni Clifford nga Sabado ang unang adlaw sa iyang leave aron masakop sa iyang bakasyon ang duha ka weekends. Naghinam-hinam na si Clifford sa iyang maanindot nga biyahe. Sakay na siya sa fastcraft nga modunggo sa dakbayan sa Tagbilaran, diin adto usab siya manukad pagbiyahe. Wala siya mokuha og travel agency mao nga nag-inusara lang si Clifford nga nagbiyahe.

Pagdunggo sa pantalan sa Tagbilaran, wala pay alas utso sa buntag mao nga nangita siya og kan-anan nga dili kaayo mahal. Nakita niya ang usa ka karendereya ug didto siya mosulod.

Hamtung-babaye ang miabi-abi kang Clifford ug mihatag sa pagkaon nga iyang giorder. “Manang, gikan dinhi sa Tagbilaran unsay atong masakyan pag-adto sa Chocolate Hills ug sa ubang mga tourist spots dinhi sa Bohol?,” gipangutana ni Clifford ang hamtung-babaye.

“Aw wala ka mikuha og travel agency Dong? Dunay awto nga paabangan diha sa unahan og usa ka libo ka pesos ang adlaw unya ikaw na ang magpa-gasolina. Kun gusto ka, ang akong anak-babaye mahimong mo-guide nimo kay mao man kini ang iyang trabaho sa una,” matud sa tag-iya sa karenderya.

Samtang nagkaon si Clifford, may miabot nga babaye nga nakapadani sa pagtagad ni Clifford. “Wala kay lingaw karon day? Kana si sir ay, gusto nga moadto sa Chocolate Hills ug ubang tourist spots apan wala kaayo siya masinati, gusto siya nga magpauban,” matud sa hamtung-babaye.

Nasayran ni Clifford nga kadtong maong gwapa nga babaye nga bag-ong misulod sa karenderya anak sa hamtung-babaye. “Pila’y akong bayranan kun magpa-guide ko nimo miss?” gisukna ni Clifford ang babaye.

“Tag P2,500 ang among charge kaniadto basta grupo, apan kun usa o duha ra ka tawo, mahimong sabut-saboton lang,” matud sa gwapa nga babaye nga mipaduol kang Clifford.

“Taga diin ka diay sir?” gisukna sa babaye si Clifford. “Taga Cebu ko miss, ako si Clifford,” paila niya sa babaye. “Ako usab si Darlyn, dati ko nga tour guide pero karon dia nagnegosyo na lang,” matud sa babaye nga nagpahiyom. (Sumpayan)