Gula 6
Daghang mga maayong laking magdudula sa iyang tropa. Pulos sila maayo’g pulso. Samtang sa Parokya Paglaom, si Santino ray saligando. Ug alang kaniya, nobatos pa kaayo si Santino. Dili pa kini makaambas sa iyang abilidad. Sa kaugalingon niyang paghulagway ni Santino, usa kini ka hulmigas nga nakigbugno sa turo. Nahanduraw niya ang talan-awon sa nagkadaiyang panagsangka, gikan sa pagpakigbugno ni Samson sa dakong leyon hangtod sa pagpakig-away ni David kang Golayat sa Daang Tugon. Sa korte, siya’y linangkob nga imahen nila ni Kobe Bryant ug Shaquille O’Neal.
Alang kang Maambong, usa ka dakong sampalita sa iyang nawong ang ilang kapildehan ngadto sa team ni Santino. Wala ra sa kumingking ang abilidad ni Santino sa iyang nahuptan. Sa sinultihan pa nga minaru, buling ra sa iyang kuko si Santino kun abilidad maoy hisgotan. Sa basketball, mas hingigo siya kay kang Santino. Hanas usab siyang mogunit og hinagiban nga mobuto. Makadaghan na usab niya pildeha si Santino sa firing. Bisan sa pangayam, kay mahiligon man usab si Santino niining maong matang sa kalingawan, wala kini dag-anan kaniya sa padaghanay og kuha. Ug ngano gyud nga napilde sila kagahapon sa Parokya Paglaom? -- Sumpayan pa