Makaeskuwela ra gayud si Jomar

Naguol kaayo si Jomar sa dihang gisultihan siya sa iyang apuhang babaye, nga dili una siya makapadayon sa iyang pag-eskuwela nianang umaabot tuig tingtungha. Nakapangandam na ra ba unta siya, ug gani, nagsabot na sila si Kent Jay, usa sa iyang mga higala, nga magpalista na sa umaabot nga Lunes.

Ang apuhan man god niya maoy naggasto kang Jomar sa pag-eskuwela. Kay anaa man sab siya motipon pagpuyo sa balay sa iyang apuhan. Kay ang iyang mga ginikanan milangyaw man ngadto sa Mindanao. Ug ang apuhan ni Jomar igo ra nga nanawat og mga labada, alang sa ilang kabuhian ug hasta pa gani sa iyang pag-eskuwela.

Mora’g dili gayod makadawat si Jomar sa hukom sa apuhan. Dako man god kaayo ang iyang tinguha, nga makapadayon gayud sa iyang pagtuon. Bisan na lang unta’g makatapos lang siya sa hayiskol. Ug dili na makapadayon pagtungha sa kolehiyo.

Sa dihang gisugo si Jomar sa paghatod og mga linabhan ngadto sa usa sa mga nagpalabada sa iyang apuhan, naglakaw siya nga wala sa maayong buot. Mora gani og kontra-gusto ang pagsugot niya sa sugo sa iyang apuhan. Ilabi na kay mikalit lang og kapawong ang nagdilaab na unta niyang tinguha sa pag-eskuwela.

Samtang nagsubay si Jomar sa sementadong dalan, nga nagbitbit gihapon sa usa ka karton nga maoy gisudlan sa mga linabhan, nakasigpat siya’g usa ka butang. Diha sa may kilid sa dalan nga iyang gisubay. Usa kini ka dakong “brown envelope”, nga gibugkosan og liston sa sapatos. Ug sa iyang pagbana-bana daghan kini’g mga gisulod.

Gidali og punit ni Jomar ang maong “brown envelope”. Ug gisusi kun unsay sulod niini. Nabantang dayon sa panan-aw ni Jomar ang nagkalainlaing mga butang nga maoy sulod sa maong envelope. Sa iyang nakita, dihay mga papeles, mga tseke ug duha ka mga “bank book”, ug mga “ATM cards”. Nga may naimprintang pangalan sa tawo.

Kay dili man kaila ni Jomar ang tag-iya sa mga butang nga iyang napunitan, nakahukom siya, nga adto kini niya ihatag sa usa sa mga estasyon sa radyo, nga dili ra usab kaayo layo sa balay nga iyang adtoan. Nga maoy hatdan niya sa mga linabhan. Gihatod una hinuon niya ang mga linabhan, una siya moadto sa estasyon sa radyo.

Ang manedyer gayud sa estasyon maoy gihatagan ni Jomar sa mga butang nga iyang napunitan. Gidayeg pa gani siya sa manedyer, ug gipasalamatan. Unya gisulat sa manedyer ang iyang ngalan ni Jomar diha sa usa ka gamay’ng notebook. Nakadayeg kaayo ang manedyer sa gibuhat ni Jomar. Nga mao ang pag-uli sa mga butang nga iyang nakit-an.

Usa ka buntag niana, may usa ka nindot kaayong sakyanan ang mihunong diha gayud sa tungod sa ilang balay ni Jomar. Sakay niini, mao ang usa ka hamtong nga lalake nga luho kaayo og pamiste. Nga nagpaila, nga usa gayud kini ka adunahan. Nangita ang maong tawo kang Jomar.

Samang nagkaatubang na sila si Jomar, ang iyang apuhan ug ang maong tawo, nagpaila ang maong tawo kanila kang Jomar. Mao diay kini ang tag-iya niadtong mga butang nga napunitan ni Jomar. Nga gisulod sa usa ka dakong “brown envelope”.

Sa ilang panagsultihanay, nahibaw-an sa maong tawo ang tinuod gayud nga pagkatawo ni Jomar. Lakip na ang ilang kahimtang. Lakip sa nahibaw-an sa maong tawo, nga usa diay ka mauswagon nga negosyante, mao ang tinguha unta ni Jomar nga makapadayon unta sa pagtuon. Apan nasanta lang ang maong tinguha tungod sa hukom sa apuhan ni Jomar. Nga dili lang una siya paeskuwelahon nianang tuig tingtungha. Kay dili na kini makasugakod sa mga galastuhan. Ilabi na sa pag-eskuwela unya niya ni Jomar.

Human masayri sa maong tawo kadtong tanan, mitanyag dayon kini sa iyang tabang ngadto sa duha. Mipasalig dayon kini nga siya na ang mogasto sa pag-eskuwela unya ni Jomar. Bisan pa gani, kun mokuha na kini’g kurso, didto sa kolehiyo. (Kataposan)