Trabaho ug gugma

Gula 6

Gikahibulong kaayo ni Glenn kun ngano nga wala motimbaya kaniya si Mr. Chiong, ang Insik nga suki niya sa pag-ayo sa air-con. Taud-taud, migawas na ang mga kawani gikan sa ilang opisina.

Nakita ni Glenn nga nagpaingon na si Tessa sa iyang nahimutangan. “Gihuwat na usab diay ko nimo Glenn? Gibauran baya ko ni Mr. Chiong nga dili makigsuod nimo kay nagduda siya nga binuang ra ang imong tuyo nako.”

Nakalitan si Glenn sa pagkadungog sa gisulti ni Tessa. Nasayran na niya kun ngano nga wala motagad kaniya si Mr. Chiong dihang nagkakita sila kaganina. Milabay ang mga adlaw, miabot ang sakyanan ni Mr. Chiong didto sa ilang shop.

“Dunay tugon si Mr. Chiong nga dili ikaw ang paayuhon sa aircon sa iyang sakyanan Glenn. Ngano ba nga nasuko man kanimo ang Insik?” nangutana kang Glenn ang superbisor sa ilang shop.

Wala na motubag pa si Glenn. Ingon sa gibati niya nga naluya siya sa hinay-hinay. Alang kaniya sayop si Mr. Chiong sa iyang pagtoo nga binuangan ra niya si Tessa sa ilang panagsuod.

Pagka hapon, nagdali si Glenn nga nag-ilis kay aron sunduon si Tessa didto sa iyang gitrabahoan. “Sori kaayo bay, dili ka na pasudlon ni Mr. Chiong,” giingnan si Glenn sa gwardya nga nagbantay sa gate sa kompaniya.

Nakapasamot kini sa iyang kasagmuyo. Taud-taud, nakita niya nga taligawas ang kotse ni Mr. Chiong gikan sa compound. Sanglit dili man heavy tinted ang kotse, nakita niya nga si Tessa kauban ni Mr. Chiong ug diha kini maglingkod sa atubangan.

Kalit natawo sa kaisipan ni Glenn nga mao tingali nga nasuko si Mr. Chiong nga nakigsuod siya kang Tessa tungod kay may kaibog kini sa iyang secretary. Huyhoy ang abaga ni Glenn nga mipauli na lang.

Apan nakahukom si Glenn nga mobisita sa iyang higala nga si Atty. Poblete didto sa Barangay Kasambagan kay duna siya’y plano nga molahos sa pakigkita ni Tessa, kang kansang balay nahimutang unahan ra sa balay sa abogado.

“Nasuroy ka man Glenn? Dali shot usa ta’g gamay, unsay gusto nimo wine o bahalina?” matud sa abogado nga nakabantay nga daw subo ang iyang higala. Nag-inom sila si Glenn ug ang higala niya nga city administrator.

“Kana sa unahan maoy balay nila ni Tessa, pero mora’g wala pa man mauli kay inig-abot ana niya gikan sa opisina anha man na sa terrace magpahayahay,” matud sa abogado.

Misamot nga nasagmuyo si Glenn. (Sumpayan)