Dumuduong

Gula 5

Daghan kanila ang nangdigwa. Ang uban miligdas sa yuta tungod sa kahubog. Siya gani nga taas og lahutay sa inom, lugos nang nakapauli sa ilang balay. Maayo gani kay gihatod siya ni Ecloy, iyang silingan kansang mga ginikanan suod sa iyang amahan.

Bisan nahubog, wala siya’y maayong kinatulgan kagabii. Ang iyang kahisagmuyo sa naangkon nilang kaparotan wala maanod sa pagmaoy. Nagsige siya’g mata-mata hangtod nga nabuntag. Mora siya’g gikalag. Bisan nagpiyong ang iyang mga mata, mosungog sa iyang hunahuna ang multo sa una nilang kapildihan. Daw may bahin sa iyang pagkatawo nga nayatakan sa maong kaparotan. Katol ang maong kamatuoran. Mao nga sayo siyang mibangon kaganinang buntag aron paghingilin sa gibating kagil-as. Dinhi siya mopaingon sa lasang sa Umakba. Nakahunahuna siya sa pagnayanaya sa gibati niyang kalagot pinaagi sa pagdangop sa kinaham niyang kalingawan, ang pagpangayam.

Sa iyang paghangad-hangad karon sa mga sanga sa kahoy aron pag-aninaw og langgam nga mapusil, may drama nga nahitabo sa iyang hunahuna.

Mao gihapoy mipasulabi pagdula-dula sa iyang kaisipan ang nahitabo sa ilang dula kagahapon. Naulaw siya sa ilang kaparotan. Dili niya ikapataas ang iyang agtang. Bisan ang mga tumatan-aw nanghimbis na nga ang ilang team maoy modaog. -- Sumpayan pa