Brayit bisag wa kahuman

Ah! Namungingi man ka ros alahas buntaga! Nagmilagro man?” ni Brenda ngadto’s iyang bana nga si Atty. Roy Ariego sa pagsulod nila sa bupete sa naulahi. Kining ilang trabaho mahulog sa family business ug “partner-in-crime” ingnon ta, ang bana’g asawa.

Kay ang bana maoy nanglaban og mga kaso, ang asawa mao ra say sekretarya. Mao pay pagkakita ni Brenda sa iyang bana dihang hapit na nilingkod sa lingkuranan tungod sa iyang lamesa, nga kuntodo sul-ob sa tanan niyang mga alahas. Nag-apod og singsing nga dunay horseshoe ug ulo sa kabayo nga bulawan iyang duha ka kamot. May dakong pulseras bulawan sa walang pulso nga may brilyantitos nga desinyo ug nitatak sa pulong “Veritas” (Latin sa pulong “kamatuoran’) May kuwentas pang bulawan sab nga gipagimaw gawas sa iyang barong. Bulawan gihapon ug dako ang pendant nga mora kalingina sa hopia sa Consolacion. Ang desinyo sa pendant Mother of Perpetual Help. Tagsa ra gyud mosul-ob og alahas si Roy. Puro regalo sa iyang mga kliyente.

“Karon pa diay ka kamatikod ini? Ikaw bitaw nakaingon nga ako ning gipangsul-ob. Kay duna ko’y pasikatan ini” ni Roy. Nilingkod na sa plastic nga lingkuranan atubangan sa iyang lamesa. “Kinsa man?” ni Brenda. “Nalimot ka sa atong giistoryahan gabii? Nga imbis nga balibaran nako si Manny Sales nga dili modawat sa iyang kaso, bungatan nako’g dakong acceptance fee. Kay kun mobayad, dawaton ang kaso. Kun dili, no deal” ni Roy. Nagpahiyom. Niduko. Gisud-ong iyang mga alahas. Gihilasan siyas iyang kaugalingon.

Kababata niya si Manny. Apan unang nadatu si Manny. Bisa’g wa kahuman og tungha. Grade five pa lang niundang na siya’g tungha. Kay dunay abilidad sa pagdesinyo og mga alahas. Dako siya’g sweldo sa paktori og alahas nga iyang gialagaran.

Samtang si Roy nakahuman og hayskul, kolehiyo ug abogasya pinaagi sa pagka-self-supporting student, si Manny nga sayong naminyo, nagpuyo na sa usa ka inilang subdivision sa dakbayan. May tulo na ka kotse. Unya niduol si Roy ni Manny kay manghuwam og kuwarta kay mokuha’g bar exams. Nibalibad si Manny kay kuno way purohan makapasar si Roy. Si Manny gikas grade one hangtud sa grade four, kanunay’ng First Honors. Samtang si Roy, 78 ray pinakataas niyang makab-ut nga average. Nagmahay si Roy nga nibiya sa panimalay ni Manny. Wa siya magdahom nga balibaran siyas iyang suod nga higala, nga barkada niya sa tanang duwa ug sa tanang binugoy nga ilang naagian.

Unya takulahaw lang nitawag ni Roy gabii ang higalang dugay nang gikalimtan niya. May kasong ikunsulta. Kay iyang kapikas gipakupot og kuwarta sa higala. Gipagamit sa lending. Unya bisa’g maayo’g lakaw ang lending, wa ni-remit iyang kapikas. May kasong giatubang si Shirley nga collection of sum of money balor og dos milyones. Nakig-appointment si Manny nga makigkita sa abogado.

“P200,000 akong pangayoong acceptance fee, Man. Diyes porsento sa total claim sa nagkiha,” ni Roy nga nagpaklipakli sa summons ibabaw sa lamesa. Niping-it si Manny pagkadungog sa abogado. Mora’g nauknol ug nakuratan. Wa magdahom nga pabayron siya’s higala. Nagbalhinbalhin iyang mata sa pagpasiklap sa mga alahas sa abogado. “Sige, Roy. Mouli una ko. Magsabut pa ming Shirley kun okay ba siya sa imong charges” ni Manny nga nitindog. Gikuha ang summons. Gihipos. Gisulod sa iyang attachè case. Nitalikod ug nilakang padulong sa pultahan sa bupete. Apan bug-at iyang mga tunob.

Sa pagsira sa pultahan dihang nakagawas na ang bisita, nag-apir ang bana’g asawa. “Makahinumdum gyud tingale to siya sa imong paggawas sa ilang balay nga minghoy ug huyhoy ang abaga” ni Brenda. “Mao nang ako, di gyud ko mo-look down og tawo. Kay motoo gyud ko anang gulong ng palad” ni Roy. Nag-apir sila’g usab. Ug nagkinataw-anay. (Kataposan) (Kadtong magbabasa nga gusto’g libreng kunsulta, dad-a ning pahina sa sugilanon sa opisina sa tagsulat. Iatol og Sabado sa buntag. Kadtong di kaanha, puwede mosulat. Unya isukip sa sulat ning sugilanon, lakip ang Money Order nga P100 para encoding, printing ug mailing expenses)