Kapait diay kun tulo ra ang anak

Malipayon si Cheding nga nakigminyo kang Mando sanglit kay iyang naseguro nga buotan kini nga pagkatawo. Gawas pa, klasmet sila niadtong nagtungha pa sila sa elementarya. Mao nga bisan ang iyang inahan, boto gayod kang Mando. Upat ka mga tuig ang milabay sa ilang pagkamagtiayon, gitugahan sila’g tulo ka buok mga anak, usa ang babaye ug duha ang lalaki. Ang gusto ni Mando, nga napulo ang ilang anak apan supak si Cheding.

“Kinahanglan nga tulo ra ka buok ang atong anak, Mando,” pulong ni Cheding. “Magpalaygit ako.”

“Ikaw ang magbuot, Cheding,” ni Mando nga wala mouyon si Cheding “Maayo ang daghang mga anak aron bibo ang balay kanunay.”

Wala palandonga nadisgrasya ang gisakyan ni Mando nga trak paingon sa bukid kay si Mando usa man ka hepe de biyahe sa trak nga magkomprahan sa kopras sa bukid; apan sa wala palandonga nawad-an og brik ang trak hangtod nga maayo kining pagkahulog sa pangpang. Sukad niadto si Cheding na dayon ang miatiman sa ilang anak ni Mando.

Tungod sa kakugi ni Cheding, ang tanan sa iyang mga anak puro nakatapos sa kolihiyo hangtod nga ang kinamagulangan miadto sa gawas tungod sa maayong kahigayonan sa   panarbaho. Ug paglabay sa laing usa ka tuig, ang sunod nga anak niya, gioperan og dakong suweldo didto sa New Jersey. Kun si Cheding ang pagbut-on, dili unta siya mosugot giagni siya sa iyang anak nga mosugot siya para sa ilang kaugalingon. Busa, walay nahimo si Cheding.

Ug paglabay sa laing usa ka tuig, ang iyang kamanghuran nga usa ka accountant sa bangko gipaadto sa ilang labaw aron modumala sa usa ka sanga didto sa Saudi. Sa laktod nga pagkasulti si Cheding ra ang mahibilin sa balay kauban sa duha ka suluguon.

Dinhi nagbasol siya kun nganong mibalibad siya kang Mando nga tulo ra gayod ka buok ang gusto niyang mga anak. Maayo unta kun unom ngadto sa napulo ka mga anak segun sa gusto ni Mando. Usa ka adlaw may nadawat si Cheding nga text gikan sa New Jersey,

“Ma, Ma! Kumusta ka,” sa text. “Segurado nga malipay ka karon. Dawata ang kuwarta nga akong ipadala kanimo. Fifty thousand kana. Palita ang tanang gusto mo aron ka magmalipayon.”

“Anak, dili ako magmalipayon pinaagi sa kuwarta,” tubag ni Cheding pinaagi sa text. “Ang gusto ko nga maghiusa kita sa balay. Ang inyong pagkawala, daw sa hinayhinay nagkalot ako sa akong lubnganan.”

Karon pilopilo ang iyang pagbasol nganong nag family planning. Dili siya magmalipayon sa kuwarta. Kun nia pa unta si Mando, segurado nga tulisokon siya. Unya samtang siya naghilak, miduol ang iyang katabang aron siya alam-alaman. (Kataposan)