Duha ka dagway sa usa ka tawo

Samtang naglakaw, nakalantaw si Claire og babayeng hamtong nga nagpaingon kaniya. Sa iyang pangagpas, gikan pa kini sa simbahan. Iya kining ikasugat. Mao nga dihang nahiduol na kini kaniya, iya kining gipangutana.

“Unsa man kanang gipunsisokan sa mga tawo diha dapit sa may simbahan, Manang?” Sukit ni Claire. “Nganong may mga polis man usab diha?”

“Si Padre Christian,” tubag sa babayeng hamtong nga daw naghangos. “Naghikog si Padre Christian. Tua, nagbitay pa sa kampanaryo ang patay niyang lawas.” Ang hamtong babaye wala na magpaabot sa sunod niyang ipangutana. Mibiya kini sa iyang atubangan ug mipadayugdog paglakaw ngadto sa unahan. Nahibilin siya nga naghinuknok sa makadiyot sa gisulti niini.

Pari naghikog? Ingon sa dili siya makatuo. Dihadiha napukaw ang iyang kuryosidad. Naikag siya pagtuki sa iyang nasayran. Mipadayon siya paglakaw paingon sa simbahan. Buot niyang sutaon ang gisulti sa hamtong babaye. Mitipon siya sa nagpunsisok nga katawhan. Miliotliot siya aron makapaduol sa simbahan.

Tuod, didto sa tumoy sa kampanaryo may nakita siyang nagbitay. Nagsul-ob kini’g sotana ug may higot nga pisi ang liog. Ug naniga ang iyang mga mata sa dihang naklaro na kini sa iyang panan-aw.

Bayhon sa usa ka lalaki! -- Kataposan