Unos sa kapalaran

Gula 7

Nasabtan ni John nga bisan sa kabag-o pa gayud sa ilang relasyon ni Janet, apan pareho sila nga nagminahalay sa usa’g-usa. “Taga dinhi ka ba gayud sa Cebu City Janet?”

“Dili uy. Taga Leyte g’yud mi John, pero kay dinhi man ko mi-graduate sa pag-eskwela, anhi na lang usab ko gusto motrabaho,” ni Janet pa. Gitug-anan usab ni John ang iyang girlfriend nga taga Mindanao gayud sila ug dili pa dugay nga mipuyo dinhi.

Tugob sa kalipay ang pagpanan-aw nila og movie. Gihatud ni John si Janet sa iyang giabtan didto sa Banilad. “Bye Janet,” nanamilit si John sa iyang girlfriend human patiki og kiss sa iyang lips. Pagkagabii, gihanduraw ni John ang panghitabo. Nakapahiyom siya sa kalit kaayo nila nga pagkarelasyon ni Janet. Mitingog ang iyang selpon. Si Janet diay ang nag-text kang John.

“Moabut diay sila si Mama ug Papa ugma John maayo unta kun magkakita mo para mailhan ka nila,” matud ni Janet. “Oki Jan, makigkita ko nila,” dali nga reply ni John.

Tuod pagka ugma, Domingo, sayo kaayo nga gikuha ni John si Janet didto sa gipuy-an niini ug nagkuyog sila sa pagsugat sa ginikanan sa dalaga didto sa pantalan. 

Naghangpanay ang inahan ug ang iyang mga ginikanan. “Adto lang ta moderitso sa ilang tiya nimo day. Ibabaw kuno sa Kapitolyo ang ilang balay,” matud sa inahan ni Janet.

Samtang nagdagan ang sakyanan, mi-ring ang selpon sa Mama ni Janet. May gikaestorya kini. “Paingon sa Kalunasan kuno Dong, katultol ka? Mag-atang ra kuno siya sa karsada,” Giingnan sa Mama ni Janet si John.

“Taga dinhi man ko Janet. Anaa na ang among balay sa unahan. Aw naa si Mama o, nagbarug daplin sa karsada,” matud ni John. “Miuli ka man lagi dayon John. Duna ko’y gihuwat nga akong igsoon gikan sa Leyte,” matud sa Mama ni John.

Natingkag ang dunggan sa inahan ni Janet nga nakadungog. Gipindot niya ang iyang selpon ug dihang mi-ring na kini. “Hello Manang, dia na ko sa daplin sa karsada.”

Dali nga migawas sa kotse ang inahan ni Janet. “Lucing, ikaw diay kini?” matud sa inahan ni Janet. “Manang Saling, sa katapusan nagkita na gayud kita. Apan nganong nasugat ka man ni John nga imong pag-umangkon?”

Daw liti sa udtong tutok ang nadungog nila ni Janet ug John. Diha pa nila masayri nga manag-agaw diay silang duha. Pareho sila nga wala makatingog uban sa pagpanaligdig sa luha sa ilang kaapingan. Sakit kaayo ang unos sa kapalaran nga mihampak kanila. (Kataposan)