Mo-eskuwela pa

Dear Tita Salie,

Have a wonderful day. Just call me Ms. Taurus, 17 years old, dalaga ug buntis.

Wala masayod ang akong mga ginikanan sa akong kahimtang karon. Nahadlok usab ako kun unsay ilang buhaton nako, Tita, sa panahon nga ilang masayran ang nahitabo nako. Nakaila man god ko sa akong mga ginikanan ug nasayod ko nga dili nila madawat nga mahitabo kini kanako.

Mas midako pa gyod ang akong problema kay dili pa andam mangamahan ang nakabuntis nako. Matud niya nga dili pa siya magminyo kay moeskuyla pa siya. Ug daghan pa kuno siya og plano sa iyang kinabuhi.

Dili usab puyde nga iyang pahibaw-on ang iyang mga ginikanan nga nakapabuntis siya kay segurado kuno nga masuko kini ug tingali kondili na siya makatiwas sa iyang pagtuon. Busa nihangyo siya nako nga dili ko mosulti ngadto sa akong parents kay gusto pa gyod siya nga moeskuyla.

Lisod kaayo kun mag-inusara ka sa imong kinabuhi, Tita. Wala na ko masayod kinsay akong duolon nga makatabang sa akong problema. Busa namasin lang ko nga imo kong katabangan. Daghang salamat sa imong pagtagad. God bless. -- Ms. Taurus

* * *

Ms. Taurus,

 Manghinaot lang ko nga ang nahitabo kanimo karon imong kakuhaan og maayong pagtulon-an kay bata pa kaayo ka ug daghan pang sitwasyon nga imong masugatan niining kalibotana. Dili maayo nga magpadalos-dalos kita sa atong mga desisyon kay ang kinabuhi dili ingon niini ka sayon. Kun dunay sayop sa atong hukom kinahanglan natong barugan kay ato kining desisyon.

Bisan pa man kun masuko ang imong mga ginikanan, bisan pa man kondili nila madawat ang nahitabo kanimo karon apan kinahanglan gyod nga imo silang sultihan kay sa imong sitwasyon nagkinahanglan ka sa imong pamilya.

Busa, mas maayo gyod nga imong ikompisal ang imong kahimtang ngadto ni mama ug papa. Natural lamang nga masuko sila tungod kay duna silay panglantaw alang sa imong kaugmaon apan wala ampingi. Dawata lang ang ilang kasuko, pasagdi nga sila masuko kanimo. Magpaubos ka kay nakasala man ka. Pangayo og pasaylo sa imong sala nga nahimo, kay imong gipakyas ang ilang mga damgo alang kanimo. Apan human nianang hitaboa, human sa imong pagkatumba paningkamot ug bangon ug ipadayon ang imong paglakaw ug ipakita sa imong mga ginikanan nga naayo na ang imong kinabuhi. I’m sure nga human sa ilang kasuko, human sila makapahungaw sa ilang kalagot mopuli ra unya ang ilang kaluoy kanimo kay bisan unsaon ila kang anak. -- Tita Salie