Duha ka dagway sa usa ka tawo

Gula 22

Mibangon siya ug migawas sa lawak. Miadto siya sa kosina ug gidulong ang nahimutangan sa refrigerator. Giablihan niya kini ug gikuha ang gisudlan sa tubig. Iya kining gitungab. Miluag ang kakutas sa iyang dughan human makainom. Pero nanglimbawot ang iyang mga balhibo samtang naghunahuna sa iyang damgo.

Nagdamgo siya nga nangatangtang ang iyang mga ngipon. Unya nahigmata siya dihang nakita diha sa iyang damgo nga usa ka kalabera ang naghingo sa iyang mga ngipon. Nalisang siya’g maayo.

Gikuyawan siyang naghunahuna sa mensahe sa iyang damgo. Sumala sa nadungog niyang sultisulti sa kakaraanan nga gisawo-sawo hangtod karon, mangil-ad ang pagdamgo og ngipon nga nangalubo kay kini nagkahulogan og kamatayon sa binuhat nga bililhon sa kinabuhi. Mituo siya nga may kahulogan ang damgo. Mao nga nabalaka siya pag-ayo.

Misamot ang iyang kabalaka dihang nahinumdom siya sa gisugilon ni Onyok nga nagmasakiton si Cecille, ang labing suod niyang higalang burikat. -- Sumpayan pa