Duha ka dagway sa usa ka tawo - Gula 21

Human sa panagsulti nila ni Onyok, milahos na si Claire ngadto sa motel diin nagpaabot na kaniya ang iyang kustomer.

Kaadlawon nang nahiuli si Claire sa balay nga iyang gipuy-an. Gihukas dayon niya ang blawos nga gisul-ob ingon man ang sayal nga kulang kaayo’g tila sa paghisulod niya sa iyang lawak. Andies ug bra na lang ang nahibilin sa iyang lawas. Human matangtang ang iyang sapatos, mihigda na siya. Lapoy kaayo siya.

Upat ka kustomer ang iyang gialagaran ug ang ulahi maoy init kaayo sa sex. Higal pas butakal sa ilang silingan kaniadto sa Consolacion. Dako ang iyang kita pero nabudlay pud siya’g maayo sa pagdala sa kataposan niyang kustomer ngadto sa binayrang paraiso.

Nahinanok na unta siya dihang kalit siyang napugwat. Mitimbakowas siya nga naghangos, daw gilutos og kaliboan ka mga multo sa iyang katulogon. Midaligdig ang hagkot ug bugnaw nga singot sa iyang agtang ug liog. Nagdamgo man gud siya. Ngil-ad nga damgo! -- Sumpayan pa