Labihang hinangopa ni Ramon nga nakadawat sa pahibalo, gikan sa ilang daku sa Makati Office; nga siya maoy ipadala ngadto sa Bataraza, Palawan, ang lugar sa minahan sa kompaniya nga iyang gitrabahoan. Gitudlo siya nga maoy tigpangulo sa maghuhukom sa pagpili kun kinsay mahimong “Miss Bataraza 2012”, usa sa mga kalihokan nga gipasiugdahan sa ilang kompaniya matag tuig.
Ala una sa hapon, gisugdan ang indigay sa katahum diha sa langoyanan sa kompaniya. Natapos kini pagka alas singko sa hapon. Si Linda maoy napiling “Miss Bataraza 2012”.
Nianang pagka gabii, samtang nagpahulay si Ramon sa Guest Lodge nga iyang giabtan, mipakita sa iyang hunahuna ang kahamis ug kais-is sa pamanit ni Linda. Wala siya makaagwanta. Iya kining gihangyo pinaagi sa cell phone: “Mahimo ba nga magdungan ta og panihapon diri sa akong giabtan?”
“Akong kalipay nga makigsalo sa imong panihapon Sir! Mga kinse minutos anaa na ako. Dili layo ang imong giabtan gikan sa balay sa kompaniya nga among gipuy-an,” ni Linda nga nahinangop.
Sa ilang panihapon, walay ukon-ukon nga mipadayag si Ramon sa iyang gibati: “Nagpabilin sa akong hunahuna ang imong katahum nga mipaso sa indigay kaganinang hapon. Ang kanipis sa gisul-ob mong bikini nga hapit nalang ipadayag ang imong mga tinagoan, naghaling og kainit nga nanganaykanay sa akong kalawasan. Wala ko kasabot sa akong kaugalingon. Galibog unsay angay nga buhaton.”
“Kasalabtunon sa imong kumedya Sir oy, gikulbaan man lang ko!” ni Linda nga giganahang naminaw.
“Gikan sa akong kasingkasing ang imong nadungog,” ni Ramon nga matinud-anon.
“Dili kaha ka mahimong kataw-anan sa imong mga kauban, nga sa imong pagkahimilian masugamak ka lang ug taga Palawan?” ni Linda nga may dalang kumedya.
“Diin mo hisayri ang akong pagkahimilian?” pangutana ni Ramon nga nahingangha.
“Si Sir baya.... mahibulong pa gyud sa iyang pagka inila sa kompaniya! Ang akong amahan, superbisor sa mga magmimina sa kompaniya. Usa ka sa iyang nailhan sa inyong opisina sa Makati. Una ko moanhi, ako siyang gipangutana bahin nimo. Akong nasayran nga ang imong edad milapas na og maayo sa kalendaryo, apan ulitawo lang gihapon ka kaayo. Dili hitupngan ang imong kahimilian.”
“Oo, himilian ako nga pagkatawo. Apan dili taas nga sumbanan ang akong gipangita sa babaye. Yano lang ang akong gusto. Ang imong pamayhon, makatilingbanong kahanas ug kaabtik manubag sa matalinghagaong pangutana; maoy mga hiyas nga nakabihag sa akong kasingkasing. Dili ko magpanuko sa pagpangasawa nimo. Kun muoyon ka, akong pangayuon sa imong mga ginikanan ang ilang pagtugot karon. Mahimo ba?” ni Ramon nga desididong mangasawa.
Mipahiyom si Linda sa salabtunong pag-uyon.
Human sa ilang panihapon, nanulod sa kuwarto si Linda ug Ramon aron tugkaron ang giladmon sa duha ka gugma nga nagkatukma.
Nakaingon si Ramon sa hilom, “Salamat sa indigay sa katahum, nakakita ko’g pangasaw-onon.” (Kataposan)