Unos sa kapalaran

Gula 2

“Naproblema bitaw ko John kay alas tres sa hapon ra ba gayud ang among interview unya basa kaayo ang akong sinena,” tubag ni Janet kang John.

“Sige, magpakarga ko’g gasolina diha sa gas station sa unahan para makasul-ob ka nianang T-shirt,” ni John pa nga misulod dayon sa gas station.

Nanaug si John sa kotse. Human mabayri ni John ang gipakarga niya nga gasolina, misakay siya pagbalik sa kotse. “Wow, haum kaayo nimo ang T-shirt Janet. Mora’g pareho tingali ang gidak-on sa atong lawas.”

Alas 2:30 na sa hapon mao nga nahukman ni John nga ihatud na lang si Janet sa dapit nga nahimutangan sa giaplayan niini nga trabaho. Gipangutana niya si Janet.

“Sa Colon na lang ko John kay naa ra sa eskena Osmeña Boulevard ang opisina nga akong giaplayan. Pwede ibilin ra usa nako ang akong basa nga sinena kay mauwaw ko nga magdala-dala og putos nga mangaplay,” matud ni Janet.

Wala magduha-duha sa pagtangdo si John. “Sigi, no problem,” matud ni John nga mibunlot sa cigaret case ug gikuha ang usa ka calling card. “Tawga lang ko kun imo na nga kuhaon ang basa nimo nga sinena Jan.”

Paspas ang pagpadagan ni John sa kotse ug dali ra sila nga miabot sa dalan Colon. “Thank you kaayo John ha? Mokontak ra ko nimo ug salamat kaayo sa T-shirt nga imong gipahuwaman,” matud ni Janet. Wala dayon mopadagan si John bisan og naglakaw na si Janet paingon sa dakung tindahan sa Colon. Karon may ideya na si John nga sa Metro Gaisano diay nangaplay og trabaho si Janet.

“Gwapa usab nga pagka babaye da,” wala makapugong si John sa paglitok sa maong pulong bisan siya ra usa sulod sa kotse. Gipadagan niya ang kotse ug sanglit Sabado man, nakahuna-huna siya nga mag-window shopping sa Metro Gaisano.

Mituyok siya aron nga maka-park sa parking area sa Metro didto sa duol sa Sanciangko. Didto sa parking area, giteksan ni John ang higala niya nga si Mario, kang kansang asawa opisyal sa Metro nga giaplayan ni Janet.

Gihangyo niya ang higala nga patabangan si Janet nga madawat sa trabaho. Tuod man, nakadawat dayon si John og reply. “Ok, doki. Tawgon nako akong Misis.”

Misuroy si John sa Metro, didto sa baligyaanan og mga kagamitan sa awto. Namalit siya og pahumot sa kotse, car shampoo ug mga pasinaw. Mitingog ang message alert sa iyang selpon. (Sumpayan)