Haring gangis si Panyong

Ayaw tawon ko’g liaba Panyong, magisi ning polo ko! pakiluoy ni Toring usa ka hapon niana. Dili ba giingnan man tika nga kada adlaw ang kalas sa hantakan iintriga mo sa ako?, pinabundak ang tingog ni Panyong nga pula na ang nawong gumikan sa inom sa tindahan ni Binong sulod sa merkado sa lungsod.

“O, dia ra, giandam na nako ning daan, ikaw lang kay apurado kayo”, sulti pa ni Toring dayong tunol sa kwartang kalas sa hantakan ngadto kang Panyong. Gibuhi-an ni Panyong ang kuwelyo sa polo ni Toring ug mapahiyumong namulong. “Naa ra man lagi na, ayaw’g dugay-dugaya sa paghatag aron dili mo katilaw nako,” sulti pahimangno ni Panyong.

Nagsulod-gawas si Panyong sa Mutinglupa gumikan sa nagkadaiyang kaso nga nahimo gikan sa tigbas, dunggab ug pusil sa iyang kalalis kun ika-engkwentro labi na’g mahubog o makainom ba hinuon. Katapusan niyang kaso mao ang pagpusil-patay niya kang Poldo kay gitablahan siya sa iyang bahin nga salapi agi sa tulis sa usa ka sapiang intsik sa bukirang bahin sa lungsod.

Dili kayo taas ang iyang sentensiya kay nagbinuotan man siya didto sa prisohan. Gikaintapan ug gikalisangan si Panyong sa ilang dapit mao nga gianggaan siya nga ‘Haring Gangis’ kay ang mga bugoy ug mga maldito moislog bisan lang sa pagtan-aw sa iyang anino. 

Gumikan sa pagkamaldito niya, namatay ang iyang asawa nga si Benigna sa konsumisyon ug kaguol.

Walay anak sila si Panyong, malagmit pagbuot sa Kahitas-an.

Libre si Panyong sa inom ug sa balay-kahilayan sa ilang dapit gumikan sa iyang pagka-isog ug pagkapriso sa Muntinglupa.

Wala’y adlaw nga dili mahuslok ug maghapi-hapi si Panyong tungod kay ang iyang gusto mao gyo’y matuman.

Pila’y estorya, wala lang damha nagkaang-kaang na si Panyong sa paglakaw kay ‘nasira’ siya sa babaye nga iyang naremedyohan sa ‘casa’ ni Madame Candida nga ilado ug nabaniog sa ilang lungsod.

Nag ubo-ubo na usab siya gumikan sa inom nga menos ang kaon. Mihugo si Panyong. Makita na ang bukog sa iyang abaga.

Wala na ang pagka ‘Adonis’ sa iyang lawas kaniadto ug ang pagka undanon sa iyang mga bukton bisa’g edad-edaran na.

Tulin nga miligid ang panahon. Nakabsan sa kinabuhi si Panyong.

Wala na ang giilang ‘Haring Gangis’ sa ilang dapit. Busa, there’s always an end to everything in this world.

Maayo gyong ampingan nato ang atong panglawas mintras buhi pa ta dinhi sa kalibutan kay usa ra ka buok ang atong kinabuhi ug wala na’y lain pa! (Kataposan)