Unos sa Kapalaran

Nagmaneho si John sa iyang kotse paingon sa opisina sa downtown area gikan nga mitambong og product presentation sa dakung kompaniya sa mga IT products kaniadtong Sabado.

Kalit lang nga mibunok ang kusug kaayo nga ulan samtang diha pa siya sa Governor Mariano Cuenco Avenue sanglit ang product presentation didto man gihimo sa usa ka kan-anan sa Banilad.

Sa unahan nakita ni John ang usa ka babaye nga nagkabuang pagpangita og kapasilongan. Walay mga kapasilongan sa iyang nahimutangan. Mipahinay pagpadagan si John sa iyang kotse.

Nakita niya nga ang babaye nagpasalipod sa usa ka punoan sa kahoy aron dili siya mabasa, apan daw mangtas kaayo ang uwan nga mibunok pag-ayo. Nakahukom si John nga kombinsihon niya ang babaye nga mosakay na lang sa iyang kotse.

Gihunongan kini ni John. Gipaubos niya ang bildo sa bentana sa passenger seat. Mikusug na gayud kaayo ang uwan. “Miss dali sakay diri kay mabasa ka pag-ayo diha!”

Nasabtan ni John nga ingon sa nagpanagana ang babaye pagsakay kaniya. “Ayaw kahadlok Miss, dili ko dautang tawo! Dali na kay kusog na kaayo ang uwan!” singgit ni John.

Kalit lang dunay mipaka sa unahan. Nakita nila nga adunay punoan sa kahoy nga natumba kay ang kusug nga uwan giubanan usab og unos. Kini maoy nakapugos sa babaye nga mosakay na lang sa kotse ni John.

“Maayo kay misanong ka sa akong pagdapit nimo Miss kay mabasa ka gayud og maayo didto,” giingnan niya ang babaye. “Basa g’yud ang akong sinena. Sori ha nabasa ning imong lingkoranan,” matud sa babaye.

“No, walay problema. Aw kun dili lang nimo lainon pagsabot, duna ko’y extra T-shirt diha sa back seat kay gihatag na didto sa gitambongan nako nga event. Isul-ob na Miss,” tanyag ni John.

Gikawhat ni John ang T-shirt nga giputos pa og selopin. “Dawata Miss, isul-ob na kay basa g’yud ang imong gisul-ob.”

Traffic na pagsaylo nila sa flyover sa Barangay Luz. “Yuna, asa ka diay mopaingon Miss? Aw ako diay si John, isipa ko nga imong friend og ayaw hatagi og kahulogan ang pagpasakay nako nimo. Asa ka diay paingon?” ni John pa. “Ako si Janet. Interview nako karong alas tres sa hapon sa giaplayan nako nga trabaho,” matud sa babaye. “Uy, kon mao na apiki na kon mopauli ka pa. Isul-ob na lang lagi kanang T-shirt Jan,” giingnan ni John si Janet. (Sumpayan)